Biryńǵaı jıyntyq tólemi qashan engiziledi
ASTANA. QazAqparat - Atalǵan salyq ózin-ózi jumyspen qamtyp júrgen azamattar úshin engiziledi. Ony tóleý, ıa tólemeý - árbir adamnyń óz erki, dep xabarlaıdy QazAqparat tilshisi.
QR Eńbek jáne xalyqty áleýmettik qorǵaý vıtse-mınıstri Nurjan Áltaevtiń aıtýynsha, atalǵan tólemdi jyldyq tabysy 100 AEK-ten (240 500 teńge, aıyna - 20 041 teńge - avt.) aspaıtyn azamattar tóleı alady.
"Biz tıisti zań jobasyn maýsym aıynda Parlament Májilisine engizýdi josparlap otyrmyz. Jyldyń aıaǵyna deıin ol zań kúshine enetin shyǵar", - dedi N.Áltaev QazAqparat tilshisine bergen suxbatynda.
Aıta keteıik, Úkimettiń búgingi otyrysynda QR Eńbek jáne xalyqty áleýmettik qorǵaý mınıstri Mádına Ábilqasymova arnaıy salyq rejımi - biryńǵaı jıyntyq tóleminiń engiziletinin málimdedi. Onyń aıtýynsha, atalǵan júıeniń negizgi maqsaty - ózin-ózi jumyspen qamtyp júrgen azamattardy tirkeý sharalaryn jeńildetip, beıresmı jumyspen qamtylǵan xalyqtyń qyzmetin zańdastyrý.
Ulttyq ekonomıka mınıstri Tımýr Súleımenovtiń aıtýynsha, biryńǵaı jıyntyq tóleminiń mólsheri qala turǵyndary úshin aıyna bir aılyq eseptik kórsetkishti, al aýyl turǵyndary úshin 0,3 aılyq eseptik kórsetkishti quraıdy. Tólem quramyna barlyq áleýmettik tólemder kiredi. Sonyń ishinde jeke tabys salyǵy - 10 protsent, mindetti zeınetaqy jarnasy - 40 protsent, memlekettik áleýmettik saqtandyrý qoryna - 10 protsent, medıtsınalyq saqtandyrý jarnasy - 40 protsent", - dedi T.Súleımenov.
