Biryńǵaı jıyntyq tólemdi tóleýge yńǵaıly servıs iske qosyldy

NUR-SULTAN. QazAqparat - eSalyq Memlekettik kirister komıtetiniń mobıldi qosymshasynda biryńǵaı jıyntyq tólemdi (BJT) tóleý úshin yńǵaıly jáne qarapaıym servıs engizildi. Qosymshany App Store jáne Play Market dúkenderinen júkteýge bolady, dep habarlaıdy Memlekettik kirister komıtetiniń baspasóz qyzmeti.

ESalyq qosymshasyndaǵy BJT «Qazpochta» AQ Internet-ekvaırıngi arqyly 100 teńge banktik komıssııamen elektrondyq úkimettiń tólem shlıýzi arqyly júzege asyrylady.

Esterińizge sala keteıik, 2019 jyldan bastap jeke jumys isteıtin barlyq ózin-ózi jumyspen qamtyǵan adamdar biryńǵaı jıyntyq tólemdi tóleýi kerek (BJT).

BJT tórt mindetti tólem túrin biriktiredi:

- jeke tabys salyǵy (JTS) ;

- memlekettik áleýmettik saqtandyrý qoryna áleýmettik aýdarymdar;

- BJZQ-daǵy zeınetaqy tólemderi;

- mindetti áleýmettik jáne medıtsınalyq saqtandyrý qoryna aýdarymdar.

Bir jolǵy biryńǵaı jıyntyq tólemniń mólsheri respýblıkalyq mańyzy bar qalalarda, astanada jáne oblystyq mańyzy bar qalalardyń turǵyndary úshin 1 AEK (2 651 teńge) bolyp bekitilgen. Basqa eldi mekenderde turatyn jeke tulǵalar 0,5 AEK (1 325,5 teńge) tóleýi tıis.

BJT tóleýshiler - jeke kásipker retinde tirkeýsiz kásipkerlik qyzmetti júzege asyratyn, sonymen qatar kelesi sharttarǵa sáıkes tulǵalar:

- biryńǵaı jıyntyq tólemdi tólegen;

- jaldanǵan qyzmetkerlerdiń eńbegin paıdalanbaıtyn;

- salyq agentteri bolyp tabylmaıtyn jeke tulǵalarǵa qyzmet kórsetetin jáne (nemese) aktsızdeletin ónimderdi qospaǵanda, tek salyq agentteri bolyp tabylmaıtyn jeke tulǵalarǵa óz óndirisiniń jeke qosalqy sharýashylyǵy aýylsharýashylyq ónimderin satatyn.

Bul rette, BJT tóleýshilerdiń kiris mólsheri 1175 AEK-ten aspaýy kerek (2020 jyly - 3 114 925 teńge).

Ózin-ózi jumyspen qamtyǵan jeke tulǵalarǵa BJT tóleý mindetti áleýmettik medıtsınalyq saqtandyrý júıesine qatysýǵa; zeınetaqy jınaqtaryn jasaýǵa jáne zeınetaqy júıesindegi eńbek ótiline baılanysty bazalyq zeınetaqy tólemin alýǵa quqyq; múgedektik, jumysynan aırylǵan, asyraýshysynan aıyrylǵan, júktilik jáne bosanǵan, balany asyrap alǵan, 1 jasqa deıingi bala kútimi bolǵan jaǵdaılarda, áleýmettik járdemaqy alýǵa múmkindikterin beredi.