Biryńǵaı jınaqtaýshy zeınetaqy qorynyń qarajaty ekonomıkany kredıtteýge jumsalýy múmkin - Q. Kelimbetov
ASTANA. QazAqparat - Biryńǵaı jınaqtaýshy zeınetaqy qorynyń qarajaty ekonomıkany kredıtteýge jumsalýy múmkin. Bul týraly búgin Parlament Májilisiniń jalpy otyrysynda QR Ulttyq banki Tóraǵasy Qaırat Kelimbetov osylaı málimdedi.
Eske salaıyq, jalpy otyrysta depýtattar «Astana» halyqaralyq qarjy ortalyǵy týraly» zań jobasyn talqylaǵan bolatyn.
«Biz qazirgi tańda Úkimetpen birlesip ekonomıkany kredıtteý máselesimen aınalysyp jatyrmyz. Sonyń ishinde Biryńǵaı jınaqtaýshy zeınetaqy qoryndaǵy qarajatty aldaǵy jyldary ekonomıkany kredıtteýge jumsaý múmkindikterin qarastyrýdamyz. Bul aýqymdy qarajattar negizinen bankterge, turǵyn úı qurylystaryna, sondaı-aq ekonomıkanyń aralas sektoryna da qatysty», - dedi Bas bankır.
Onyń aıtýynsha, aldaǵy ýaqytta el ekonomıkasy úshin qoljetimdi ári qymbat emes teńgemen qamtamasyz etý máselesi tolyq sheshimin tabady.
«Bul jaǵynan esh másele joq. Degenmen, «búgingi ahýal qarapaıym, jeńil» dep eshkim aıta almaıdy. Eń bastysy, erteń dollar baǵasy ne bolaryn eshkim dóp basyp aıta almaıdy», - dedi Q. Kelimbetov.
