Biryńǵaı jınaqtaýshy zeınetaqy qorynyń aktıvi 14,1 trln teńgege jetti

ASTANA. QazAqparat – Biryńǵaı jınaqtaýshy zeınetaqy qorynyń zeınetaqy aktıvteri 14,1 trln teńgeni qurady. Bul týraly Úkimet otyrysynda QR Ulttyq bank tóraǵasynyń orynbasary Berik Sholpanqulov aıtty, dep habarlaıdy QazAqparat tilshisi.

«Biryńǵaı jınaqtaýshy zeınetaqy qorynyń zeınetaqy aktıvteri jyl basynan beri 1,1 trln teńgege nemese 8,3 paıyzǵa ulǵaıyp, qazan aıynyń sońynda 14,1 trln teńgeni qurady. Jyl basynan beri ınvestıtsııalyq tabys kólemi - 672,5 mlrd teńgeni, zeınetaqy jarnalary – 1 379,3 mlrd teńgeni, zeınetaqy tólemderi – 218,2 mlrd teńgeni, merziminen buryn alyp qoıý 868,9 mlrd teńgeni qurap otyr», - dedi Berik Sholpanqulov.

Onyń dereginshe, 9 aıdyń aldyn ala qorytyndysy boıynsha tólem balansynyń aǵymdaǵy shoty profıtsıtpen qalyptasyp, saýda balansynyń jaqsarýyna baılanysty 7,9 mlrd dollar boldy.

«Saýda balansynyń profıtsıti ótken jyldyń uqsas kezeńimen salystyrǵanda 15,9 mlrd dollarǵa ulǵaıyp, 29,3 mlrd dollardy qurady. Sheteldik tikeleı ınvestorlardyń tabysy 3,7 mlrd dollarǵa artyp, 20,2 mlrd dollar boldy», - dedi ol.

Foto: externallearningaustralia.com.au