Biryńǵaı jınaqtaýshy zeınetaqy qoryn qurý zeınetaqy jınaqtarynyń saqtalýyna kepil bolady - S. Ábdenov
ASTANA. 17 sáýir. QazAqparat - Biryńǵaı jınaqtaýshy zeınetaqy qoryn qurý zeınetaqy jınaqtarynyń saqtalýyn, zeınetaqy aktıvterin basqarýdyń ashyqtyǵy men ony baqylaýdy qamtamasyz etedi.
Búgin Parlament Májilisiniń jalpy otyrysynda «Qazaqstan Respýblıkasynda zeınetaqymen qamsyzdandyrý týraly» zań jobasy boıynsha baıandaǵan Eńbek jáne halyqty áleýmettik qorǵaý mınıstri Serik Ábdenov osylaı málim etti.
Mınıstrdiń aıtýynsha, zań jobasyndaǵy basty jańalyqtardyń biri Memleket basshysynyń tapsyrmasyna sáıkes, Biryńǵaı jınaqtaýshy zeınetaqy qoryn qurý bolyp tabylady. Bul rette Qazaqstan Úkimeti atalmysh jınaqtaýshy qordyń quryltaıshysy jáne aktsıoneri bolady. Al ınvestıtsııalyq strategııa QR Prezıdentiniń sheshimimen qurylatyn Zeınetaqy aktıvterin basqarý jónindegi keńespen bekitiledi. Biryńǵaı jınaqtaýshy zeınetaqy qory júıesin QR Ulttyq banki basqarady.
«Mindetti zeınetaqylyq jınaqtaý, salymdardyń saqtalýy boıynsha memlekettik kepildik qamtylady. Jalpy alǵanda Biryńǵaı jınaqtaýshy zeınetaqy qoryn qurý zeınetaqy salymdarynyń saqtalýyn, zeınetaqy aktıvterin basqarýdy baqylaýda ustaýdy, qor qyzmetiniń ashyqtyǵyn qamtamasyz etýdi qarastyrady. Sonymen qatar, ınvestıtsııalyq tabystylyqty arttyrý esebinen zeınetaqy jınaqtarynyń tıisti ósimin qamtamasyz etý sharalary qarastyrylady», dedi S. Ábdenov.
