Biryńǵaı zeınetaqy qorynda 600 myńǵa jýyq «ıesiz» zeınetaqy esepshottary bar
ASTANA. QazAqparat - Búgindi tańda Biryńǵaı jınaqtaýshy zeınetaqy qorynda jalpy jarnasy 1,2 mlrd. teńgeni quraıtyn 600 myńǵa jýyq «ıesiz» zeınetaqy esepshottary bar. Bul týraly búgin Májilistegi «Nur Otan» partııasy fraktsııasynyń otyrysynda atalǵan qordyń basshysy Rýslan Erdenaev málim etti.
Onyń atap ótýinshe, bul esepshottardyń barlyǵy da eskerilgen ári olarǵa ınvestıtsııalyq kirister aýdarylyp turady. «Bul qarjylar «óli júk» bolyp jatqan joq. Atalǵan 1,2 mlrd. teńgege osy jyldary ishinde 3,8 mlrd. teńge ınvestıtsııalyq kiris aýdaryldy»,- dedi osy rette sózge aralasqan QR Ulttyq bankiniń tóraǵasy Qaırat Kelimbetov.
R.Erdenaevtyń sózine qaraǵanda, buǵan deıin «ıesiz» qalǵan mundaı esepshottardyń sany mıllıonǵa jetip jyǵylǵan. Búginde aı saıyn 1,5 myńǵa jýyq qatelik ketken esepshottar túzetilip, ıaǵnı ıeleri tabylyp otyrady. Aldaǵy ýaqytta bul jumystar bir ortalyqtan júrgiziletin bolady.
«Mundaı shottardyń paıda bolýynyń basty sebebi adamdar shetelge ketkennen keıin bul esepshottardy esten shyǵarady ne bolmasa adam qaıtys bolǵannan keıin muragerleri izdemeıdi», - dedi qor basshysy.
