Biryńǵaı ulttyq densaýlyq saqtaý júıesi ózin-ózi aqtap otyr, tek endi ony jetildire túsý qajet - BQO
ORAL. 28 qarasha. QazAqparat /Eljan Eraly/ - Biryńǵaı ulttyq densaýlyq saqtaý júıesi ózin-ózi aqtap otyr, tek endi ony jetildire túsý qajet. Bul týraly osy máselege arnalyp, Oralda ótkizilgen keńeste aıtyldy.
Jıynǵa qatysqan QR Densaýlyq saqtaý mınıstrligi medıtsınalyq kómekti uıymdastyrý departamentiniń dırektory Ajar Tóleǵalıevanyń atap ótkenindeı, atalmysh júıeniń engizilýi densaýlyq saqtaý salasynda básekelestik ortanyń ornyǵyp, emdeý sapasynyń artýyna oń áser etti. Qazirgi kezde, burynǵydaı ortasha baǵamen emes, emdelip shyqqan ár adam úshin medıtsınalyq mekemelerge tólenýde. Olardyń bárine de teń jaǵdaı týǵyzyldy. Ár emdelýshi aýrýhanany, meıli ol óńirde bolsyn, ortalyqta bolsyn, ózi tańdaı alady. Sondyqtan ár mekeme óz qyzmetin jaqsartpaıynsha, tabysqa qol jetkize almaıdy. Endigi maqsat - atalmysh júıeniń keıbir tustaryn medıtsına mamandarymen aqyldasa otyryp, jetildirý, aldaǵy jylǵa maqsat-mindet belgileý.
