Biryńǵaı tarıfti bekitýge qatysty esepteýler júrgizilýde - UEM

ASTANA. QazAqparat - Qazaqstan biryńǵaı tarıfti bekitýge qatysty zertteýler men esepteýler júrip jatyr. Búgin Májiliste «Tabıǵı monopolııalar týraly» zań jobasyn tanystyrý barysynda Ulttyq ekonomıka vıtse-mınıstri Serik Jumanǵarın osylaı aıtty, dep habarlaıdy QazAqparat.

«Ózderińiz bilesizder, elimizdiń ońtústik óńirleri gaz ben elektr energııasynda tapshylyǵy bar aımaq. Osy oraıda batys óńirden gaz, soltústik óńirden elektr energııasy keledi. Bul turǵyda biryńǵaı tarıfti biriktirýge toqtalsaq, bul másele óńirlerdiń jaǵdaıyna baılanysty. Árbir óńirdiń ekonomıkalyq qurylymy qazirgi baǵaǵa oraı sáıkestendirilgen. Dál qazir biryńǵaı tarıf jasasaq, keıbir óńirde tarıf tómendese, al keıbirinde kóteriledi. Jalpy, bunyń yqpaly qandaı bolady? Sondyqtan osy baǵytta esepteýler júrgizý kerek», - dep toqtaldy Jumanǵarın.

Onyń sózine qaraǵanda, búginde biryńǵaı tarıfke qatysty usynystar túsýde. Úkimette usynystar aıasynda tıisti esepteýler júrip jatyr.

«Biz aldymen esepteýlerdi aıaqtaıyq. Sonyń nátıjesinde qabyldanǵan sheshimge oraı aqparat beretin bolamyz», - dedi vıtse-mınıstr tilshilerge bergen jaýabynda.