Biryńǵaı memlekettik josparlaý salasynda birtutastyq qaǵıdaty qamtylmaqshy - Senat
ASTANA. 13 maýsym. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine
olardy QR Memlekettik josparlaý júıesimen sáıkestendirý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Zań jobasynyń basty maqsaty memlekettik josparlaý salasynda strategııalyq jáne baǵdarlamalyq qujattardy ázirleý, iske asyrý jáne ońtaılandyrý úshin biryńǵaı quqyqtyq jaǵdaılardy qamtamasyz etý bolyp tabylady. Qazirgi tańda memlekettik josparlaý júıesi birqatar qujattardan turady. Atap aıtqanda, olar: Qazaqstannyń 2050 jylǵa deıingi Damý strategııasy, Qazaqstan Respýblıkasynyń 2020 jylǵa arnalǵan damý jospary, elimizdiń aýmaqtyq keńistigi damýynyń boljamdy shemasy, Ulttyq qaýipsizdik strategııasy, basqa da memlekettik baǵdarlamalar, sondaı-aq áleýmettik-ekonomıkalyq damý boljamdary, aýmaqtardaǵy damytý strategııasy, salalyq baǵdarlamalar men respýblıkalyq jáne jergilikti bıýdjet jáne t.b.
«Memlekettik josparlaý júıesiniń negizgi qaǵıdaty biryńǵaı memlekettik josparlaý salasyndaǵy zańnamalyq birtutastyq bolyp tabylady. Sonymen qatar, tájirıbe barysynda qoldanystaǵy zańnamadaǵy memlekettik josparlaý júıesine sáıkes kelmeıtin, keıbir jaǵdaılarda tipti qaıshy keletin normalardyń bar ekeni anyqtalǵan. Atap aıtqanda, keıbir zańnamalarda qandaı da bir máseleler boıynsha jalpy memlekettik, óńirlik, respýblıkalyq sektoraralyq jáne basqa baǵdarlamalar ázirleý qarastyrylǵan. Osyǵan oraı, Elbasy qoldanystaǵy zańnamalardan memlekettik organdardy strategııalyq jáne baǵdarlamalyq qujattardy ázirleýge mindetteıtin normalardy alyp tastaýdy tapsyrǵan bolatyn», - deıdi Ekonomıka jáne bıýdjettik josparlaý mınıstri Erbolat Dosaev.
Jalpy, zań jobasymen qoldanystaǵy 91 zańnamalyq aktige: 7 kodeks jáne 84 zańǵa ózgerister men tolyqtyrýlar engizý qarastyrylǵan.
