Biryńǵaı qabyldaý kúni: Batysqazaqstandyqtar qandaı suraqtarmen kelip jatyr

ORAL. QazAqparat – Búgin H.Bókeeva atyndaǵy Batys Qazaqstan oblystyq qazaq drama teatrynda «Azamattardy qabyldaýdyń biryńǵaı kúni» ótip jatyr, dep habarlaıdy QazAqparat tilshisi.

Turǵyndardy oblys ákimi men onyń orynbasarlary, Oral qalasynyń, oblystyq basqarmalar men departamentterdiń, quqyq orǵaý organdary men kommýnaldyq mekemelerdiń basshylary jeke máseleleri boıynsha qabyldady.

Solardyń biri Oral qalasynyń turǵyny Hales Rahmetov І toptaǵy múgedek.

«Osynda bárimiz de máselemiz sheshile me degen úmitpen keldik. Ipotekamen nesıe alyp edik. Qazir qarajattan qınalyp, soǵan kómek surap, oblys basshysy Ǵalı Esqalıevke jolyqtym. Keıin habarlasamyz degen jaýap aldyq», - dedi QazAqparat tilshisine H.Rahmetov.

Taǵy bir turǵyn Vera Ýlanova turǵyn úı máselesimen kelgen. Onyń sózine qaraǵanda, ákesi, Ekinshi dúnıejúzilik soǵystyń ardageri Grıgorıı Nedopekın 2003 jyly kóz jumsa, anasy Evdokııa – tyl eńbekkeri. Soǵan oraı 2014 jyly bir bólmeli páter alǵan. Osynyń ornyna 2 bólmeli páterge qol jetkizgisi keledi.

Qalalyq turǵyn úı-kommýnaldyq sharýashylyǵy turǵyn úı ınspektsııasy bólimi basshysynyń orynbasary Qanat Ómirálıevtiń aıtýynsha, E.Nedopekına EDS ardagerine teńestirilgen tulǵa retinde kezekke turyp, arnaıy salynǵan úıden bir páter alyp, keıin jekeshelendirgen. Sondyqtan oǵan qosymsha úı berýge zańdy negiz joq.

Turǵyndardy qabyldaý odan ári jalǵasýda.