Biryńǵaı qabyldaý kúni: 12 myńnan astam turǵynnyń aryz-shaǵymy tyńdaldy
2019 jylǵy 21 qarashada Prezıdenttiń «Halyq únine qulaq asatyn memleket» tujyrymdamasy aıasynda respýblıka boıynsha «Azamattardy qabyldaýdyń biryńǵaı kúni» ótken bolatyn. Shara aıasynda qala ákimi, qala ákimi orynbasarlary, basqarma basshylary men aýdan ákimderi azamattardy qabyldady.
Nátıjesinde ortalyq memlekettik organdardyń birinshi basshylary jáne 47 qala, 179 aýdan jáne 2771 aýyldyq okrýg ákimderi turǵyndardyń aryz-shaǵymyn tyńdady.
Respýblıka boıynsha qabyldaý organdaryna 12,6 myń adam júgindi, onyń 12,4 myńy – jergilikti atqarýshy organdarǵa, 172 adam – ortalyq memlekettik organdarǵa jáne 50 adam – QR Prezıdenti Ákimshiliginiń qabyldaýyna jazylǵan.
Óńirler arasynda Almaty oblysynyń (1683 adam), Aqmola (1205) jáne Qostanaı (1042) oblystarynyń turǵyndary belsendilik tanytqan. Olarmen salystyrǵanda Shymkent (128), Almaty (309) qalalary men Qaraǵandy oblysynda (354) júginýshiler sany óte az bolǵan.
Ortalyq memlekettik organdar arasynda eń kóp shaǵymdanýshylar Іshki ister mınıstrligine (101 adam), Eńbek jáne halyqty áleýmettik qorǵaý mınıstrligine (60 adam) jáne Densaýlyq saqtaý mınıstrligine (30 adam) barǵan.
Jergilikti atqarýshy organdarǵa kelip túsken ótinishteriniń 70% kommýnaldyq qyzmet, áleýmettik qorǵaý, turǵyn úı jáne jer qatynastary máselelerimen baılanysty bolǵan. Ortalyq memlekettik organdarda negizgi quzyretterimen baılanysty máseleler qozǵalǵan.
Áleýmettik máseleler boıynsha Eńbek jáne halyqty áleýmettik qorǵaý mınıstrligine turǵyndar qaryz júktemesiniń tómendeýi jáne Ataýly áleýmettik kómek (22 adam), kóp balaly analar (10 adam) jáne múgedekterdi qoldaý (16 adam) jóninde júgingen.
Jalpy, Biryńǵaı qabyldaý kúni barlyq respýblıkalyq jáne óńirlik BAQ-ta, áleýmettik jelilerde keńinen habarlandy. Ásirese, 92 jyl kýáliksiz ómir súrgen azamat, áleýmettik kómeksiz qalǵan SІM burynǵy qyzmetkerleri, alıment tóleý máseleleri BAQ-ta jarııalandy.
Sondaı-aq, Qostanaı oblysynyń ákimi Arhımed Muhambetov Shoqan Ýálıhanovtyń týǵan jerin naqty anyqtaý boıynsha tapsyrma berdi. Al pavlodarlyq oqýshy Elıseı Resnıaskıı oblys ákimine tuzdy oblystyń geologııalyq beligisi etip bekitýdi jáne Ertis óńirindegi ár oqý ornynda týǵan jerge arnalǵan burysh ashýdy usyndy.
