Birtutas ult ıdeıasy qazaq kim degen suraqqa jaýap izdeýdi alǵa shyǵaryp otyr - Nurtóre Júsip
ALMATY. 15 aqpan. QazAqparat - BAQ-taǵy memlekettik tapsyrysty memlekettiń saıasatyna negizdep quryp, qazaqtyń mádenıetinde tárbıelengen halyqtyń shoǵyryn jasaýǵa umtylys jasaý kerek.
Bul týraly keshe Almatyda ótken «Aldaspan» ashyq pikirsaıys alańynyń ekinshi otyrysynda aıtyldy.
«Birtutas ult ıdeıasy júzege asý úshin qazaq ulty ózge ulys ókilderin óz baýyryna tartyp, bir azamattyqqa qadam jasaý kerek. Qazaq bolý til tutastyǵyna jol ashady. Al bir ult bolyp, bir tilde sóılegen adamnyń adamnyń muńy da, armany da, maqsaty da bir. Bir ult bolý Qazaqstan halqyn qazaq mádenıetinde tárbıeleý máselesin alǵa shyǵarady", - deıdi "Aıqyn" gazetiniń bas redaktory Nurtóre Júsip.
Onyń aıtýynsha, qazaq mádenıetinde halyqty tárbıeleý degen máselege birinshi kezekte qyzmet etetin buqaralyq aqparat quraldary (BAQ) qyzmetkerleri bolýǵa tıis. Ókinishke qaraı orys jáne qazaq tildi BAQ degen bólinis kóp jaǵdaıda bizdi ekiudaıǵa alyp kelip otyr. Mysaly, Alash partııasynyń toqsan jyldyq mereıli datasy orys basylymdarynda tıip-qashty ǵana kórsetildi. Abaı, Qasym jáne taǵy basqa aqyn, jazýshylardyń mereıtoılary tam-tumdap berildi. Osylaısha basqa ulys ókilderi qazaq mádenıetinen, ádebıetinen qalys qalýda. Nurtóre Júsiptiń sózine qaraǵanda, ony sheshýdiń birden-bir joly, máselen, radıo men telearnalardyń jıilikterin bergende táýliktiń 24 saǵatynyń keminde 16 saǵaty qazaqtyń áni men sazyn, dástúrin dáriptep, nasıhattalýǵa arnalady degen sııaqty talap qoıylýy kerek. Sondaı-aq memlekettik tapsyrys bergende de halyqty qazaq mádenıetinde tárbıeleýge mán berilýi tıis.
