Birtanovtyń densaýlyq saqtaýdy damytýǵa baǵyttalǵan bes bastamasy

ASTANA. QazAqparat - Densaýlyq saqtaý mınıstri Eljan Birtanov elimizdiń densaýlyq saqtaý salasyn ári qaraı jańǵyrtý maqsatynda bes bastama kóterdi. Bul týraly mınıstr vedomstvonyń alqa otyrysynda məlim etti, dep habarlaıdy QazAqparat.

Mınıstr aıtqan birinshi bastama - densaýlyq saqtaý júıesin patsıentterdiń múddesine qaraı ıntegratsııalaý. Bul - alǵashqy saýyqtyrýshy bólikten bastap, barlyq kezeńderdi qamtıtyn medıtsınalyq kómek kórsetýdiń biriktirilgen júıesin engizýdi qarastyrady.

Ekinshi bastama - EYDU usynystaryna saı standarttardy sáıkestendirý. Bul sharalar aıasynda jeke medıtsınany damytýdaǵy kedergilerdi joıý, memlekettik fýnktsııalardy táýelsiz kásibı ortaǵa berý, dári-dármek jáne medıtsınalyq buıymdardyń baǵasyn retteý josparlanǵan.

«Úshinshi bastama baǵytynda densaýlyq saqtaý salasyndaǵy ınfraqurylymdyq jáne kadrlyq saıasatty qaıta qaraý sharalary qarastyrylǵan. Jeke jáne sheteldik ınvestıtsııalar tartý, memlekettik-jekemenshik áriptestikti damytýǵa, ǵylym men medıtsınalyq bilimdi jetildirýge mán berilmek»,-dedi Eljan Birtanov.

Al, tórtinshi bastama retinde nátıjege negizdelgen qarjylandyrýdyń ońtaıly júıesin qalyptastyrý mindeti qoıylyp otyr.

«Besinshi bastama - patsıentke esep beretin jáne transparenttilikti qarastyratyn júıeni basqarý. Osyǵan baılanysty medıtsınalyq mekemelerge sharýashylyq júrgizý quqyn bere otyryp, korporatıvti basqarý júıesin engizý, maqsaty - qyzmet kórsetý sapasy men tıimdiligi patsıenttiń múddesine baǵyttalǵan medıtsınalyq qyzmet kórsetýshiler úshin KPI ázirleý josparlanǵan»,-dedi mınıstr.

Atalǵan bastamalardy kóterýdegi negizgi maqsat - medıtsınalyq qyzmettiń halyqqa qoljetimdiligi men sapasyn qamtamasyz etý bolyp tabylady.