Birtanovtyń advokaty sýdıaǵa qarsy shaǵym jasady

NUR-SULTAN. QazAqparat – Densaýlyq saqtaý mınıstrliginiń burynǵy basshysy Eljan Birtanovtyń advokaty Nurlan Beısekeev sot otyrysynda Nur-Sultan qalasynyń №2 Saryarqa aýdandyq sotynyń sýdıasy Ibragım Álkenovke qarsy shaǵym bildirdi, dep habarlaıdy QazAqparat tilshisi.

«Sot alqasy zań buzý faktisin rastap, prokýratýraǵa qujattardy aǵylshyn tiline aýdarý, olardy materıaldarǵa qosý, baǵalaý arqyly buzýshylyqtardy joıýdy, sodan keıin ǵana sotqa deıingi is júrgizý satysynda sheshim qabyldaýdy mindettegen.

Úsh túrli sheshim bolýy múmkin – qylmystyq isti toqtatý, qylmystyq qýdalaýdy jalǵastyrý nemese osy is jónindegi óndiristi ýaqytsha toqtata turý. Sot alqasy Bas prokýratýrany osy nusqaýlardy oryndaýǵa mindettegen. Konstıtýtsııanyń 76-baby 3-bóligi boıynsha sot qaýlylary Qazaqstan aýmaǵynda oryndalýǵa mindetti. Ókinishke qaraı, sýdıa Álkenov Konstıtýtsııanyń osy talabyn oryndaýdan bas tartty. Qysqartyp aıtsaq, bul – qylmystyq sot óndirisiniń protsedýrasyn buzý», - dep túsindirdi ol bul talabyn BAQ ókilderine.

Sýdıa Ábınur Qarabaev úzilisten keıin qorǵaýshy taraptyń talaby oryndalmaıtynyn málim etti.

«Advokat Beısekeevtiń sýdııa Álkenovtiń osy iske tóraǵalyq etýine bildirgen qarsylyǵy týraly ótinishi keri qaıtarylsyn. Qaýly shaǵymdanýǵa jatpaıdy. Qaýlymen kelispeıtini týraly ýájderdi apellıatsııalyq shaǵym men prokýratýra ótinishine engizýge bolady», - dedi narazylyq bildirý týraly shaǵymdy qaraǵan sýdıa Ábınur Qarabaev.

Onyń aıtýynsha, sot sýdıa Ibragım Álkenovtiń osy qylmystyq iske múddeliligi týraly dálelderdi tyńdap, oǵan qarsylyq bildiretindeı negiz tappaǵan.

«Sýdıa Álkenovtiń negizgi sot isin júrgizýi taǵaıyndalýy onyń bul iske tikeleı nemese janama túrde qyzyǵýshylyq tanytýyna nemese memlekettik aıyptaýdyń, protsestiń basqa qatysýshylarynyń qysymyna ushyraýyna negiz emes. Bul jaǵdaıda qorǵaýshy tarap talap etip otyrǵan aýdarmany sot qabyrǵasynda oryndaýǵa bolady. Sýdıa Álkenov aýdarmashy taǵaıyndap, búkil materıaldy aýdarmaǵa usynady», - dedi sýdıa.

Aıta keteıik, búgin sýdıa Ibragım Álkenov Eljan Birtanovtyń advokattary negizgi sot otyrysyna tartylǵan memlekettik aıyptaýshylar men Densaýlyq saqtaý mınıstrligi ókiline bildirgen qarsylyqty qabyldamaı tastaǵan edi.

Burynǵy densaýlyq saqtaý mınıstri Eljan Birtanov 2020 jyldyń 3 qarashasynda bıýdjet qarajatyn ysyrap etti degen kúdikpen qamaýǵa alynǵan bolatyn.

Tergeý materıaly boıynsha, Eljan Birtanov pen onyń kómekshisi bolǵan Oljas Ábishevke «laýazymdyq ókiletin teris paıdalaný» arqyly memleketke 1,5 mlrd teńgeniń shyǵyny keltirgeni týraly aıyp taǵylyp otyr.

Al bıyl 12 mamyrda sot Eljan Birtanovqa qatysty qylmystyq isti toqtatýdan bas tartqan edi.