Birtanovtiń Úkimettegi esebi: Shyǵys Qazaqstanda ana ólimi 53% joǵary
«Densaýlyq saqtaý qyzmetteriniń barlyq fýnktsııalaryn ıntegratsııalaý boıynsha ekinshi baǵyt aıasynda medıtsınalyq-sanıtarlyq alǵashqy kómektiń qoljetimdiligin qamtamasyz etý jónindegi sharalar oryndaldy. Dárigerlik ýchaski men jalpy praktıkalyq dárigerlerdiń sany ulǵaıdy. Barlyq óńirlerde aýrýlardy basqarý baǵdarlamasy engizilip jatyr. Endi patsıent óz aýrýyn baqylaýǵa belsendi tartylyp jatyr. Bıyldan bastap, bul tájirıbe ári qaraı keńeıtiledi», - dedi Úkimet otyrysynda «Densaýlyq» memlekettik baǵdarlamasynyń ótken jylǵy qorytyndysyn shyǵarǵan Eljan Birtanov.
Onyń aıtýynsha, medıtsınalyq qyzmetterdiń alǵashqy býynymen ıntegratsııa aıasynda emhanalarda qosymsha týberkýlezge qarsy onkologııalyq-mommologııalyq kabınetter ashyldy. Bul sharalar ana men náreste ólimi men elimiz boıynsha jalpy qaterlik isikten bolatyn ólimdi tómendetýge múmkindik berdi.
«Sondaı-aq birqatar óńirlerde respýblıkalyq mánnen aıtarlyqtaı artyq kórsetkishter baıqalyp otyr. Shyǵys Qazaqstan oblysynda ana ólimi respýblıkalyq deńgeıden 53 paıyzǵa joǵary. Qostanaı oblysynda náreste ólimi respýblıkalyq deńgeıden 31 paıyzǵa kóp. Al Pavlodar oblysynda qaterlik isikten bolatyn ólim 56 paıyzǵa artyq. Qurmetti oblys basshylary, osyǵan oraı kelesideı negizgi baǵyttar boıynsha jumysty kúsheıtý qajet. Birinshiden, skrınıngter men profılaktıkalyq tekserip qaraý. Ekinshi, júkti áıelderdi ýaqytynda esepke alý jáne 1 jasqa deıingi balalarǵa patronaj boıynsha atqarylatyn sharalardy 100 paıyzǵa jetkizý qajet», - dedi ol.