Birtanov jilik maıyn transplantatsııalaý úshin balalardyń shetelge jiberilýin túsindirdi

NUR-SULTAN. QazAqparat - 2018 jyly Qazaqstanda 47 balaǵa jilik maıyn aýystyrý boıynsha ota jasaldy. Bul týraly búgin halyqpen eseptik kezdesý ótkizgen QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Mańyzdy jetistikterdiń biri - bul jilik maıyn transplantatsııalaý. Bul, otandyq medıtsınamyzdaǵy jan aýyrtarlyq máselelerdiń biri. Balalarymyzdy jilik maıyn transplantatsııalaý úshin shetelge jiberýge májbúr bolyp otyrmyz. Ol ońaı ota emes jáne daıyndyqtyń uzaq merzimin, uzaq ýaqyt boıy kútim men ońaltýdy talap etedi. Shetelge jiberý arqyly bul problemany sheshý múmkin emes», - dedi mınıstr.

Osy rette ol atalǵan tehnologııamen emdeýdi Qazaqstanda da qolǵa alýdyń mańyzdylyǵyn aıryqsha atap ótti.

«Biz ótken jyly munymen baıypty túrde aınalystyq. Byltyr balalardyń jilik maıyn transplantatsııalaýdyń 47 otasy jasaldy. Qazirgi ýaqytta qajettiliktiń arta túsýi baıqalady. Búgingi kúni onyń jartysyn ózimiz sheship otyrmyz. Taıaý 2-3 jyldyq jol kartamyz bar jáne bul problemany sheshemiz», - dedi Eljan Birtanov.