Birtanov: Sanofi-diń bizdiń laýazymdy tulǵalarǵa para berý jaǵdaıy bolǵan emes
Aıta ketsek, buǵan deıin birqatar BAQ quraldarynda Sanofi kompanııasynyń Qazaqstandaǵy jáne Taıaý Shyǵystaǵy enshiles kásiporyndary óz óniminiń satylymyn arttyrý úshin laýazymdy adamdarǵa para bergeni týraly aqparat taraǵan bolatyn. Aqparat AQSh-tyń qundy qaǵazdar jáne bırjalar boıynsha Komıssııasy saıtynda jarııalanǵan edi. Sarapshylar frantsýz kompanııasynyń ókilderi memleketpen kelisimge kelý úshin para bergenin aıtqan.
Búgin atalǵan másele boıynsha QR Densaýlyq saqtaý vıtse-mınıstri Alekseı Tsoı pikir bildirgen. Al keshke qaraı OKQ-da ótken jıynda buǵan qatysty suraq mınıstr Eljan Birtanovtyń da ózine qoıyldy.
«Sanofi-ge qatysty aqparatty biz aldyq. Meniń ózim AQSh Úkimetiniń saıtynan ol aqparatty kórdim. Bul jalpy alǵanda ishki tergeý jumystaryn júrgizýge arnalǵan standartty halyqaralyq tájirıbe. Kompanııa ókilderiniń keltirgen málimetine súıensek, atalǵan sheshim kompanııanyń ishki aýdıtine negizdelgen. Bizdiń tarapymyzdan atalmysh kompanııaǵa qatysty para berý nemese ózge de buzýshylyq boıynsha qylmystyq quqyqbuzýshylyq jaǵdaılary tirkelgen joq. Demek, bunyń bári ishki esepshilik qujattarǵa negizdelgen», - dedi mınıstr.
Eljan Birtanov ótken jyly barlyq sheteldik kompanııalarmen etıkalyq kodekske qol qoıylǵanyn, ol boıynsha Qazaqstan dári-dármekterdiń shynaıy ári ádil taratylýyna súıenetinin atap ótti. Kóptegen farmkompanııalar osy kodekske qol qoıǵan.
«Sonymen birge osy jyly Memleket basshysynyń tapsyrmasyna sáıkes, dári-dármekterdiń baǵasyn retteýge arnalǵan jańa zań jobasyn ázirledik. Osy zań jobasy aıasynda dári-dármekterdiń taralýyn dál osy etıkalyq jolmen júrgizý qarastyrylǵan. ıAǵnı, dári-dármekti óndirýshiler, satyp alýshylar, jekeleı satatyn dárihanalar dári-dármekterdi ótkizýde etıkadan tys áreketterge barmaıdy. Bul halyqaralyq standarttarǵa kezeń-kezeńmen jaqyndaý bolyp esepteledi. Bul jumysty ózimiz bastap, farmkompanııalarmen belsendi túrde júrgizip jatyrmyz. Ol boıynsha tek artyq áreketke barǵan dárigerler ǵana emes, sonymen birge farmatsevtıkalyq bıznes ókilderin de ákimshilik jaýapkershilikke tartý qarastyrylǵan. ıAǵnı, jaýapkershilik barlyq tarapqa teń bólinýi kerek. Bul bizdiń pozıtsııa», - dedi ol.
Sonymen birge, Eljan Birtanov eń aldymen, bul máseleni qaýzamas buryn AQSh-tyń qundy qaǵazdar jáne bırjalar boıynsha komıssııasy saıtynda jarııalanǵan baspasóz málimdemesimen tanysý kerektigin eske saldy.
«Ol jerde kompanııaǵa qatysty óndiris bastalǵany jazylǵan. Ol óndiristiń qylmystyq nemese ákimshilik ekenin bilmeımin. Oǵan esepshilik qujattarda laýazymdy tulǵalardy «satyp alýǵa» arnalǵan jeke qorlar men rezervterdiń kezdesýi negiz bolyp otyr. Demek, laýazymdy tulǵalardy satyp alý faktileri týraly naqty baspasóz málimdemesinde aıtylmaıdy. Budan buryn da aıtqanymdaı, búgingi kúni dál osy kompanııa tarapynan (Sanofi -avt.) bizde laýazymdy tulǵalardy satyp alý jaǵdaıy tirkelgen joq. Sonymen birge, ózderińizge málim bolǵandaı, ótken jyly laýazymdy tulǵalarǵa qatysty birneshe qylmystyq is qozǵalyp, is áli tergelip jatyr. Biz olardyń isi dál osy kompanııamen qatysy bar nemese joq dep aıta almaımyz. Sondyqtan, bul suraqty menińshe quqyq qorǵaý organdaryna joldaý kerek. Bizge belgili bolyp otyrǵandaı, bizde ondaı aqparat joq. Aqparat esepshilik qujattardyń tabylýyna negizdelip otyr», - dedi mınıstr.