Birtanov oblystyq aýrýhanalarda juqpaly aýrýlarǵa arnalǵan bloktar jasaýdy tapsyrdy

ALMATY. QazAqparat - QR Densaýlyq saqtaý mınıstri Eljan Birtanov Almaty óńirine issapary nátıjesinde aýdandyq jáne oblystyq aýrýhanalarda juqpaly aýrýlarǵa arnalǵan arnaıy blok jasaýdy tapsyrdy, dep habarlaıdy QazAqparat tilshisi.

Mınıstrlik basshysy oblystyq jáne aýdandyq aýrýhanalarda QR DSM standarty saqtalmaǵanyn aıtty.

Onyń aıtýynsha, barlyq kópprofıldi aýrýhanalardyń janynan juqpaly aýrýlarǵa arnalǵan blok ashylýy tıis.

«Aýdandyq jáne oblystyq aýrýhanalarda ınfektsııalyq bólimder joq. Naýqastardy eski tártip boıynsha Qaskeleńge aparady eken. Osyǵan baılanysty jergilikti ákimdikterge ınfektsııalyq boks jasaý tapsyryldy. Talǵar aýdandyq aýrýhanasyna,  Qaskeleń aýrýhanasyna da sondaı tapsyrma berildi. Esik qalasynda jeke blok bar eken», - dedi mınıstr.

Aıta ketý kerek, Almaty oblysynda menıngokokk juqpasynan kóz jumǵan 19 jasar boıjetkendi jedel járdem Talǵar qalasynan Qaskeleńge jetkizbek bolǵan. Qyz 2 saǵatqa sozylǵan jolda kóz jumdy.

Jedel járdemniń jumysyn qalyń kópshilik synǵa alǵan edi.

Sondaı-aq, bul olqylyqty Úkimet otyrysynda Premer mınıstr Baqytjan Saǵyntaev ta mınıstr Eljan Birtanovtyń betine basqan bolatyn. Aıtylǵan syn-pikirden soń mınıstr Almaty aımaǵyna resmı saparmen shyqqan edi. Mınıstrlik basshysy óńirdegi birqatar juqpaly aýrýlar jáne klınıkalyq aýrýhanalardy aralap jaı-kúıin baqylady.

Mınıstr sonymen qatar, Qaskeleń juqpaly aýrýlar aýrýhanasyn jabý týraly sheshim qabyldanatynyn aıtty.

Al, aýrýhananyń bas dárigerin kásibı biliktiliginiń tómendigine baılanysty ákimshilik jazaǵa tartýdy usyndy.