Birtanov qant dıabetine shaldyqqandarǵa arnalǵan mobıldik qosymsha jasaýdy tapsyrdy

ASTANA. QazAqparat  - QR Densaýlyq saqtaý mınıstri Eljan Birtanov jyl sońyna deıin qant dıabetine qatysty aqparat usynatyn mobıldik qosymsha jasaýdy tapsyrdy, dep habarlaıdy «QazAqparat» HAA tilshisi.

Mınıstr keltirgen resmı derekkke súıensek, Qazaqstanda qant dıabetine shaldyqqandardyń sany 300 myńnan asady.

«Qazir «mobıldik medıtsına» degen de uǵym paıda boldy. Demek, mobıldik qosymshalar arqyly adam óz densaýlyǵy týraly mán-jaıdy bilip otyra alady. Biz de bul ózgeristen qalys qalmaq emespiz. Búgingi kúni meniń tapsyrmam negizinde kóp kezdesetin negizgi aýrýlar boıynsha mobıldik qosymshalar jasalyp jatyr. Qant dıabeti boıynsha birneshe sheshimder bar. Jyldyń sońyna deıin halyqqa naqty osy qosymshany usynýymyz kerek», - dedi mınıstr Astanada ótken «Qant dıabeti jáne qoǵam» atty dóńgelek ústelde.

Eljan Birtanovtyń sózine súıensek, Qazaqstanda qazirgi tańda 50 myńǵa jýyq ana «Meniń júktiligim» qosymshasyn paıdalanady eken.

«Biz bıýdjetten eshqandaı aqsha shyǵarǵan joqpyz. Búgingi jıynda barlyq qant dıabeti syrqaty boıynsha patsıentterge arnap mobıldik qosymsha jasaý máselesin talqylaýdy usynamyn. Mobıldik qosymsha adamdar úshin dıspanserleý deńgeıin kóterip, patsıentterge monıtorıng jasap, medıkamentterdi ýaqytyly qabyldap, dıeta jáne dene belsendiliginiń turaqtylyǵyn qamtamasyz etedi», - deıdi mınıstr.