Birtanov depýtattarǵa mindetti medıtsınalyq saqtandyrýǵa engiziletin ózgeristerdi tanystyrdy
ASTANA. QazAqparat - QR Densaýlyq saqtaý mınıstri Eljan Birtanov Parlament Májilisinde QR keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn tanystyrdy, dep habarlaıdy QazAqparat.
Aıta keteıik, 2017 jyldan bastap Mindetti áleýmettik medıtsınalyq saqtandyrý engiziledi. 2015 jyly 16 qarashada «Mindetti áleýmettik medıtsınalyq saqtandyrý týraly» zań qabyldandy. Ol medıtsınalyq saqtandyrý júıesin qalyptastyrý boıynsha normalardy kózdeıdi.
«Bul zań jobasy 6 kodeks pen 16 zańǵa ózgerister engizýdi kózdeıdi. Mindetti áleýmettik medıtsınalyq saqtandyrý boıynsha, zań jobasy mólsherlemelerdi jáne aýdarymdar men jarnalardy esepteý nysandaryn ózgertý, sondaı-aq tóleýshilerdiń jańa sanattaryn, olar úshin jarnalardy memleket júzege asyratyn jańa adamdar sanatyn engizý, áleýmettik medıtsınalyq saqtandyrý qorynyń jumysyn uıymdastyrý jáne medıtsınalyq saqtandyrý men tegin medıtsınalyq kómek kepildik kólemi júıesinde dári-dármekpen qamtamasyz etý syndy máselelerge qatysty ózgerister usynylady», - dedi mınıstr.
Onyń sózinshe, makroekonomıkalyq ahýaldyń turaqsyzdyǵyna oraı, medıtsınalyq saqtandyrýda jumys berýshiler men jeke kásipkerlerdiń jarna úlesin kemitý usynylǵan bolatyn. Atalmysh usynys Úkimet tarapynan qoldaýǵa ıe boldy.
Jańa zań jobasy boıynsha, jumys berýshilerdiń jarnalary 2017 jyldyń 1 shildesinen - 1 paıyz, 2018 jyldyń 1 qańtarynan - 1,5 paıyz, 2022 jylǵa deıin onyń kólemin 3 paıyzǵa jetkizý kózdelgen. Ózin-ózi jumyspen qamtyǵan azamattar 2018 jyldyń 1 qańtarynan bastap, saqtandyrý qoryna 5 paıyz jarna tóleıtin bolady.
«18 jasqa deıingi múgedek balaǵa kútim júrgizetin jumyssyz tulǵalarǵa memleket esebinen jarna tólenedi, joǵary oqý ornyn ishteı bitirgen túlekter 3 aıǵa jarna tóleýden bosatylady. Jumyssyz júrgen oralmandar tirkelgen kúnnen bastap, bir jylǵa deıin memleket esebinen mindetti saqtandyrýǵa ıe bola alady. Tegin medıtsınalyq saqtandyrýǵa jumyssyz júrgen jáne Qazaqstanda turaqty turatyn shetel azamattary, olardyń ishinde zeınetkerler, balalar, múgedekter, stýdentter qol jetkize alady», - dedi mınıstr.
Onyń aıtýynsha, medıtsınalyq qyzmetter áskerı, quqyq qorǵaý organdarynyń qyzmetkerleri úshin áskerı medıtsınalyq bólimshelerde memleket esebinen tegin júrgiziletin bolady.
