Birtanov aýrýhanalarǵa dári-dármektiń jetkizilmeý sebebin túsindirdi

ASTANA. QazAqparat - Búgin Úkimet otyrysynda QR Densaýlyq saqtaý mınıstri Eljan Birtanov óńirlerge dári-dármek jetkizýdiń kesheýildeý sebebin túsindirdi, dep habarlaıdy QazAqparat.

«Jyl basynan monıtorıng júrgizip, belgili bir merzimde qaı óńirde jetispeýshilik bolýy múmkindigin aldyn ala bilý kerek edi. Eljan Amantaıuly, bul turǵyda jumystardy kúsheıtý qajet. Jyl saıyn jeltoqsanda dári-dármek jetkiziletinin bilemiz. Aǵymdaǵy jyly keshigip jatyrmyz. Sebebi ne?», - dep surady Úkimet basshysy Baqytjan Saǵyntaev Densaýlyq saqtaý mınıstrinen.

Óz kezeginde Birtanovtyń túsindirýinshe, zańnamalyq turǵyda ortalyqtandyrýdyń jańa modeli bekitilip, birqatar normatıvtik qujattar kesh qabyldanǵan. «Sol sebepti osyndaı jaǵdaı oryn alyp otyr», - dedi mınıstr.

«Endi ne bolmaq? Jyldyń basynda óńirlerde dári-dármek bola ma?», - dep naqtylap surady Premer-Mınıstr.

Mınıstrdiń aıtýynsha, qaldyq dári-dármekterge saraptama jasalǵan. kóptegen dárilerdiń jetkilikti qory bar.

«Otandyq óndirýshiler shyǵaratyn dáriler tikeleı kelisimshart boıynsha jetkiziledi. Konkýrs arqyly satyp alatyn dári-dármek qana qalyp otyr. Osyǵan baılanysty satyp alýlar erejesine ózgerister engizýdi suraımyz. Sol kezde qańtardyń basynda barlyq dári-dármekter jetkiziletin bolady», - dedi Birtanov.