Birtanov ana ólimi máselesin retteý boıynsha Úkimet basshysynan kómek surady
Mınıstrdiń aıtýynsha, 2018 jyldyń birinshi jartyjyldyǵynda memlekettik baǵdarlamadaǵy 35 kórsetkishtiń ekeýine qol jetkizilmegen. Onyń biri - qan aınalym júıesi men tynys alý aǵzalary aýrýlary jáne qaterli isik bolsa, nátıjege qol jetkizilmegen ekinshi kórsetkish - ana ólimi bolyp otyr.
«Ana ólimi boıynsha SQO, Aqmola, Qaraǵandy, Qyzylorda, ShQO, Jambyl, BQO, Túrkistan oblystarynyń kórsetkishteri tómen. Bul óńirlerge júrgizilgen taldaý birqatar negizgi sebepterdi anyqtady. Birinshiden, akýsher-gınekolog, reanımatolog, anestezıolog dárigerlerdiń tapshylyǵy. Ekinshiden, kóp óńirlerde densaýlyq saqtaý basqarmalarynda osy baǵyt boıynsha basshylardyń bolmaýy. Jáne árıne, eń mańyzdysy - júkti áıelderdiń kesh esepke alynýy. Ekstragenetaldyq patologııa deımiz, basqa da júıeli aýrýlar sanynyń ósýi», - dep atap ótti Eljan Birtanov Úkimet otyrysynda.
Mınıstr ana óliminiń aldyn alý maqsatynda, densaýlyq saqtaý basqarmalarynyń bala kóterý jasyndaǵy áıeldermen jumysty kúsheıtý qajettigin jetkizdi. Jáne medıtsınalyq uıymdarda uıymdastyrý, basqarý is-sharalaryn júrgizý qajet.
«Qurmetti Baqytjan Ábdiruly, sizdiń óńirlerdiń ákimderine olardyń qatysýymen joǵaryda kórsetilgen sharalardy oryndaý úshin, ana men bala ólimin tómendetý boıynsha óńirlik shtab otyrysyn ótkizýdi tapsyrýdy suraımyn. Sondaı-aq, úshinshi toqsan qortyndysy boıynsha Úkimette osy másele boıynsha jeke keńes ótkizýdi suraımyn», - dedi mınıstr Úkimet basshysy Baqytjan Saǵyntaevqa qarata aıtqan sózinde.
Aıta keteıik, Úkimettiń búgingi otyrysynda QR Densaýlyq saqtaý mınıstri Eljan Birtanov pen Astana qalasynyń ákimi Áset Isekeshev elorda perzenthanasyndaǵy ana ólimi boıynsha jaýap berdi.
Keshe Astananyń №2 perınataldy ortalyǵynda jas bosanǵan kelinshek kóz jumdy. Ol - Astana perzenthanalarynda qaıtys bolǵan tórtinshi adam.