Birtanov Almaty qalasy dárigerlerine medıtsınalyq saqtandyrýdy engizý máselelerin túsindirdi
«Jıynǵa Qazaqstan Respýblıkasy Densaýlyq saqtaý mınıstrliginiń aımaqtyq komıtet basshylary, MÁMS-ti engizýdiń aqparattyq-túsindirý jumystary boıynsha qalalyq shtab músheleri, Almaty qalasy densaýlyq saqtaý basqarmasy kollegııasynyń músheleri, densaýlyq saqtaý basqarmasy basshylary, Almaty qalasy medıtsınalyq uıymdardyń ókilderi, salalyq birlestikter men ÚEU ókilderi qatysty», dep habarlaıdy QR densaýlyq saqtaý mınıstrliginiń baspasóz qyzmeti.
«Memleket basshysy densaýlyq saqtaý salasyn tıimdi basqarý men qarjylandyrý boıynsha naqty tapsyrmalar berdi. Elimizde mindetti áleýmettik medıtsınalyq saqtandyrýdy engizý - atalǵan máselelerdi sheshýge negizdelip, halyqqa kórsetiletin medıtsınalyq kómektiń sapasy men qoljetimdiligin arttyrýǵa baǵyttalǵan. Mınıstrlik halyqtyń densaýlyǵyn nyǵaıtýdy qolǵa alýymyz kerek. Sondaı-aq. «Densaýlyq» memlekettik baǵdarlamasy aıasynda aýrýlardyń aldyn alý, eń aldymen, Qazaqstanda qoǵamdyq densaýlyq qyzmetin qurý boıynsha biriktirilgen úlgi negizinde halyqtyń densaýlyǵyn nyǵaıtý boıynsha jańa saıasatty engizý maqsaty quryldy», - dedi Eljan Birtanov.
Bıyl 1 shildesinen bastap memleket, jumys berýshi men azamattardyń ortaq jaýapkershiligine negizdelgen mindetti áleýmettik medıtsınalyq saqtandyrý engiziletin bolady. Bul júıeniń tıimdiligin halyqaralyq tájirıbe dáleldegen. Medıtsınalyq saqtandyrý júıesiniń qatysýshylaryna medıtsınalyq qyzmetterdiń aýqymdy kólemi usynylady. Halyqtyń áleýmettik turǵydan qorǵalmaǵan sanatyn memleket qoldaıtyn bolady. Úkimet densaýlyq saqtaý salasyn tıisti aqparattandyrý júıesimen qamtamasyz etýi shart. Básekelestikti arttyrý maqsatynda medıtsınalyq saqtandyrý júıesinde jeke medıtsınalyq uıymdarǵa teńdeı múmkindik berilýi tıis. Úkimet pen ákimdikterge aýqymdy aqparattyq-túsindirme jumystaryn qamtamasyz etýdi tapsyramyn», - dedi Memleket basshysy óziniń 2017 jylǵy 31 qańtardaǵy «Qazaqstannyń úshinshi jańǵyrýy: jahandyq básekege qabilettilik» atty halyqqa Joldaýynda.
QR Densaýlyq saqtaý basshysy medıtsınalyq saqtandyrý salasyndaǵy zań jobalaryna engiziletin jańalyqtar týraly da aıtty. Onda jarna tóleýshilerdiń barlyq sanaty boıynsha tólem mólsherlemesin tómendetý, jarnasy memleket esebinen tólenetin azamattar sanatyn keńeıtý boıynsha, sonymen qatar, medıtsınalyq saqtandyrý júıesiniń jumys isteý tetikteri kórsetilgen.
Esterińizge sala keteıik, 2015 jylǵy qarashada «Mindetti áleýmettik medıtsınalyq saqtandyrý týraly» QR Zańy qabyldandy. 2016 jylǵy 22 jeltoqsanda Memleket basshysy «Keıbir zańnamalyq aktilerge densaýlyq saqtaý jáne áleýmettik-eńbek salasy máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Atalǵan qujatqa sáıkes Medıtsınalyq saqtandyrý qoryna tólenetin jarnalar merzimi 2017 jylǵy 1 shildeden 2018 jylǵy 1 qańtarǵa aýystyryldy.
Jumys berýshiler, jeke kásipkerler, jeke notarıýstar, jeke sot oryndaýshylary, advokattar, kásibı medıatorlar, azamattyq-quqyqtyq negizdegi kelisim boıynsha kiris tabatyn jeke tulǵalardyń Qorǵa tóleıtin jarnalary 2017 jylǵy 1 qańtardan 2017 jylǵy 1 shildege aýystyryldy. Jaldamaly jumysshylardyń jarna tóleý merzimi burynǵydaı - 2019 jyldan bastalady.
MÁMS júıesindegi jeke tulǵalardyń medıtsınalyq kómek alý, densaýlyq saqtaý uıymyn tańdaý men medıtsınalyq kómektiń kólemin anyqtaý quqyǵy 2016 jylǵy 1 qańtardan bastap júzege asyrylatyn bolady.
Qazirgi tańda jarna tóleýshilerdiń barlyq sanaty boıynsha tólem mólsherlemesin tómendetý, jarnasy memleket esebinen tólenetin azamattar sanatyn keńeıtý boıynsha, sonymen qatar, medıtsınalyq saqtandyrý júıesiniń jumys isteý tetikteri kórsetilgen zań jobasy daıyndalýda.
Medıtsınalyq saqtandyrý júıesin engizýdiń maqsaty memleket, jumys berýshi men azamattardyń ortaq jaýapkershiligine negizdelgen medıtsınalyq kómek kórsetý mindettemeleri men kepildik berýdiń turaqty ári úılestirilgen júıesin qurý bolyp tabylady.
Osylaısha, densaýlyq saqtaý júıesindegi árbir azamattyń qatysý deńgeıi men jaýapkershiligi naqty anyqtalatyn bolady.
MÁMS-tiń negizgi artyqshylyqtary: densaýlyq saqtaý júıesindegi memleket, jumys berýshi men azamattardyń ortaq jaýapkershiligi, áleýmettik baǵdar, MÁMS mindettemesi, teńdeı qoljetimdilik (kiris pen jarna kólemine qaramastan árbir azamat MÁMS paketi aıasynda qajetti medıtsınalyq kómekti ala alady), medıtsınalyq uıymdar arasyndaǵy básekelestik, qyzmetter sapasynyń joǵarylaýy, strategııalyq satyp alýlar, densaýlyq saqtaý salasyn qosymsha qarjylandyrý, jeke jáne beıresmı tólemderdi azaıtý.