Birtanov Aqtóbedegi medıtsına salasynyń jumysyn ózge óńirlerge úlgi etti
AQTÓBE. QazAqparat - Marat Ospanov atyndaǵy Batys Qazaqstan memlekettik medıtsınalyq ýnıversıtetine bıyl 60 jyl. Densaýlyq saqtaý mınıstri Eljan Birtanov aqtóbelikterdi quttyqtap, memlekettik-jeke menshik seriktestik aıasynda atqarylyp jatqan isti úlgi etti, dep habarlaıdy QazAqparat tilshisi.
Aqtóbedegi medıtsınalyq ýnıversıtet 60 jyl ishinde 25 myńnan astam mamandy daıarlady. Akademık Jaqsylyq Dosqalıev sala mınıstri boldy. Ulttyq neırohırýrgııa ortalyǵynyń dırektory Serik Aqsholaqov ta osy bilim ordasyn támamdady. Densaýlyq saqtaý mınıstri Eljan Birtanov aqtóbelikterdi onlaın rejımde quttyqtap, memlekettik-jeke menshik seriktestik aıasynda atqarylyp jatqan isterge oń baǵa berdi.
«Ýnıversıtet qurylǵannan bastap osy jyldarǵa deıin 25 myńnan astam maman daıyndady. Ýnıversıtet túlekteriniń arasynda Qazaqstan Respýblıkasynyń memlekettik syılyq laýreattary, Ulttyq ǵylymı akademııasy men medıtsınalyq ǵylymı akademııasynyń 20-dan astam akademıgi jáne korrespondenti shyqty. 300-den astam ǵylym doktory, professor, 1 myńnan astam ǵylym kandıdaty bar. Sonymen qatar, 15 PhD doktor bar Bul óńirde memlekettik-jeke menshik seriktestik aıasynda birneshe medıtsınalyq mekeme salynyp jatyr. Bul basqa óńirler úshin úlgi bolarlyq is»,- dedi Densaýlyq saqtaý mınıstri Eljan Birtanov.
Aqtóbe elimizde alǵash ret medıtsınalyq ýnıversıtet bazasynda klaster qurdy. Óńirde azǵa almastyrý operatsııasy jasalyp, kúrdeli aýrýlarǵa em kórsetildi. Adamdardyń ómir súrý uzaqtyǵy 72,8 jetti.
«Ótken jyly Úkimettiń sheshimimen ýnıversıtet bazasynda Qazaqstanda birinshi ret medıtsınalyq klaster qurdy. Maqsat - óz mamanymyzdy, mekemelerdi paıdalanyp, batys óńirine, kórshi el azamattaryna qyzmet kórsetý. Bir jyldyq qorytyndy jasaldy, nátıjesi jaqsy. Taıaýda óńirde «Týǵan jer» repýblıkalyq forýmy ótip, júrek, baýyr, búırek, býynǵa 29 operatsııa jasaldy. Árbir salanyń sapasy, damýy, nátıjesi, bolashaǵy mamandaryna baılanysty. Densaýlyq saqtaý salasy jumysynyń nátıjeli bolýy mamandardy daıyndap jatqan medıtsınalyq joǵary oqý ornynyń eńbegi dep bilemin. Bilim ordasy óz memleketimizge, kórshi memleketterge mamandar daıyndaýǵa úles qosyp júr. Qazaqstanda eki Eńbek eri bar, onyń biri osy ýnıversıtettiń túlegi. Bári eńbekpen bolady. Bul oqý ornynda Tóregeldi Sharmanov, Jaqsylyq Dosqalıev rektor boldy. Jaqsy basshynyń jumysy jaqsy maman daıyndaýǵa septigin tıgizedi», - dedi óńir basshysy Berdibek Saparbaev.
Keıin Aqtóbe oblysynyń densaýlyq saqtaý salasynyń damýyna jáne zamanaýı medıtsınalyq tehnologııany engizýge qosqan úlesi úshin alǵys hat jáne medalimen oqytýshylar Namaz Іzimbergenov, Balash Túsipqalıev, Qaıyrǵalı Ahmetov, Qýanǵalı Ábdirahmanovqa berildi.
Aqtóbede ótken «Medıtsına bilimi men ǵylymyndaǵy ıntegratsııa, seriktestik jáne ınnovatsııa» atty halyqaralyq konferentsııaǵa akademık Tóregeldi Sharmanov qatysyp, birneshe ǵylymı eńbekterin, kitaby men bıe sútinen jasalǵan shokoladty tartý etti.
Aıta keteıik, Marat Ospanov atyndaǵy Batys Qazaqstan memlektetik medıtsınalyq ýnıversıtette 800 oqytýshy, 5 myń stýdent bar. Munda birneshe oqý ǵımaraty, laboratorııa, emhana men jataqhana bar. Ýnıversıtet rektory Erbol Bekmuhambetov Aqtóbe oblysynyń oblysynyń ákimi Berdibek Saparbaevqa, akademıkter Tóregeldi Sharmanov, Jaqsylyq Dosqalıevke, Marat Ospanovtyń jubaıy Baqyt Ospanovaǵa baǵaly metaldan jasalǵan «Qurmet» ordenin berdi. Halyqaralyq konferentsııa aıasynda Reseı, Izraıl, Qyrǵyzstan, Ýkraına, Lıtva hırýrgteri 50-den astam ota jasaıdy. 
