Birneshe jyl ishinde balalar ólimi eki esege azaıdy - Rıza Boranbaeva
ASTANA. QazAqparat - Pedıatrııa jáne balalar hırýrgııasy ǵylymı ortalyǵy Memleket basshysy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty bıylǵy Qazaqstan halqyna arnalǵan Joldaýyn talqylady. Jıynda Joldaýdyń negizgi on basymdyǵy saralanyp, oı-pikirler ortaǵa salyndy, dep habarlaıdy QazAqparat atalǵan ortalyqtyń baspasóz qyzmetine silteme jasap.
Jıyndy ashqan Pedıatrııa ortalyǵynyń dırektory Rıza Boranbaeva Elbasy Joldaýyndaǵy basty qadamdarǵa jan-jaqty toqtalyp ótip, onda kórsetilgen ár reforma men densaýlyq salasyna qatysty ortalyq aldynda qoıylǵan mindetterdi atap ótti.
«Elbasy bıylǵy Joldaýynda da densaýlyq salasyna basty nazar aýdardy. Ásirese, jasóspirimderdiń densaýlyǵyn qorǵaýǵa erekshe nazar aýdarý qajet ekendigin jáne halyqtyń ómir súrý uzaqtyǵynyń ósýine jáne medıtsınalyq tehnologııalardyń damýyna baılanysty medıtsınalyq qyzmet kórsetýge degen suranys kólemi arta túsetinin, medıtsınalyq kómektiń deńgeıin kóterý, sonymen qatar, salamatty ómir saltyn nasıhattaı otyryp, qoǵamdyq densaýlyqty basqarý isin kúsheıtý qajettigin basa aıtty. Bul rette Pedıatrııa ortalyǵynda maqsatty jumystar júrgizilip keledi. Sońǵy jyldary balalardaǵy onkologııalyq aýrýlardy emdeýdiń jańa baǵdarlamasyn engizýdiń arqasynda kúrdeli aýrýǵa shaldyqqan balalardyń ómirsheńdigin jaqsartýǵa qol jetýde. Birneshe jyl ishinde balalar ólimi eki esege azaıdy. Bizdiń ǵana ortalyqta jasalynatyn jáne basqa esh jerde júrgizilmeıtin, biregeı dıagnostıkalyq zertteý ádisterin júrgizetin jaqsy klınıkalyq-dıagnostıkalyq zerthanamyz bar. Aldaǵy ýaqytta bul baǵyttaǵy jumystar Elbasy tapsyrmasyna sáıkes jalǵasyn tabatyn bolady», - dedi R.Boranbaeva.
Ortalyq dırektorynyń pikirinshe, Joldaýda adam kapıtalyn damytýǵa basa nazar aýdarylyp otyrǵandyǵy óte mańyzdy.
«Adam kapıtalyn damytatyn resýrstar bolmasa, jańǵyrtý, jańarý, eldi damytý týraly aıtýdyń qajeti az. Bul basty resýrstar - densaýlyq saqtaý jáne bilim berý salalarynda ǵana emes, barlyq salalarda da kóbirek nazar aýdarylǵany jón. Damyǵan elderdiń ózinde, bilimniń eń qundy jáne senimdi kapıtal ekendigi dáleldengen. Adam kapıtaly teorııasyn basshylyqqa ala otyryp, óz memleketeriniń damýynda úlken, iri tabystarǵa jetken elder kóp», - deıdi R.Boranbaeva.
Onyń aıtýynsha. Pedıatrııa ortalyǵy qazirgi ýaqytta densaýlyq salasyn tsıfrlandyrý men qyzmet kórsetýdi ońtaılandyrý boıynsha medıtsınalyq aqparattyq júıeni engizýde. Bul jańa tehnologııalar jumys sapasyn arttyrýǵa septigin tıgizetini sózsiz.
«Árbir salany elep-ekshep, artyq-ereksheligin, kem-ketigin nazarynda ustap, árdaıym sony usynystar men tyń ıdeıalardy ortaǵa salyp, halyqtyń jumyla jumys isteýine negiz bolyp otyrǵan bıylǵy Joldaýda eldiń aldaǵy damýy taǵy bir márte aıqyndaldy. Ár reformany júzege asyrýdyń ár qadamy qadaý-qadaý aıtylǵan bolsa, endigi kezekte árbir qadamnan nátıje shyǵarýdyń ashyq ta aıqyn joly tizbekteldi. Endigi maqsat - osy damý tetigin joǵaltpaı, basty nysanaǵa ilgerileýdi, kemeldikke jetýdi ǵana alyp, sol jolda aıanbaı eńbek etý, birlese qımylǵa kóshý, elimizdiń gúldenýi úshin atsalysý, óz úlesińdi qosý árbir qazaqstandyqtyń paryzy bolýy kerek. Sonda ǵana oń nátıje shyǵary sózsiz», - dep sózin túıindedi ortalyq basshysy.
