Birneshe jyl boıy qyzyn zorlady degen kúdikke ilingen sottalýshy aqtalyp shyqty

AQTAÝ. QazAqparat – Mańǵystaýda birneshe jyl boıy qyzyn zorlady dep kúdikke ilingen sottalýshynyń kinásiniń dáleldenbeýine baılanysty sot aqtaý úkimin shyǵardy. Bul týraly Mańǵystaý oblystyq sotynyń baspasóz qyzmetinen málim etti, dep habarlaıdy QazAqparat tilshisi.

Er adamǵa qatysty is Mańǵystaý oblysynyń qylmystyq ister jónindegi mamandandyrylǵan aýdanaralyq sotynda qaraldy. Oǵan QR Qylmystyq kodeksiniń 124-babynyń 2-bóligi jáne QR Qylmystyq kodeksiniń 120-babynyń 4-bóligi boıynsha aıyp taǵyldy.

«Kúdikti 2016-2021 jyldar aralyǵynda azǵyndyq jasady jáne kámeletke tolmaǵan qyzyn birneshe ret zorlady dep aıyptaldy» delingen baspasóz málimetinde.

Prokýror men kámeletke tolmaǵan jábirlenýshiniń zańdy ókili sottalýshyny kináli dep tanýdy jáne oǵan 25 jyl merzimge bas bostandyǵynan aıyrý jazasyn taǵaıyndaýdy surady. Sondaı-aq, olar sottalýshydan moraldyq zııan retinde 30 000 000 teńge óndirip alýdy surady.

Nátıjesinde sot sottalýshynyń kinásiniń dáleldenbeýine baılanysty aqtaý úkimin shyǵardy.

«Sot protsesinde sottalýshynyń kinási rastalmady. Zańdy ókildiń, kámeletke tolmaǵan jábirlenýshiniń, sondaı-aq kámeletke tolmaǵan kýányń aıǵaqtary is boıynsha jınalǵan dáleldermen, atap aıtqanda sot-medıtsınalyq saraptamanyń qorytyndysymen teriske shyǵaryldy. Aqtalǵandarǵa qylmystyq jaýapkershilikke zańsyz tartýdan keltirilgen zııandy óteý quqyǵy túsindirildi», - dedi sottyń baspasóz qyzmeti.

Sot úkimi zańdy kúshine engen joq.