Birneshe ret para alǵan QTJ-nyń stansa bastyǵy 8 jylǵa sottaldy

NUR-SULTAN. QazAqparat – Birneshe ret para aldy degen kúdikke ilingen «Qazaqstan temir joly - Júk tasymaly» AQ fılıaly Altynkól stansasynyń bastyǵy J.T.Untaqbaevqa qatysty sot isine núkte qoıyldy, dep habarlaıdy QazAqparat tilshisi.

«Ol «Altynkól» keden beketiniń bas mamany E.M.Tóleevpen jáne taýar kassasynyń bastyǵy A.M.Stamqulovamen aldyn ala sóz baılasyp, radıatsııalyq fony joǵary vagondardy kedergisiz ótkizgeni úshin 4 mln 324 teńge kóleminde para aldy degen kúdikke ilindi. Sondaı-aq, Untaqbaev «Altynkól» stansasynyń júk aýdanynyń bastyǵy T.P.Qaldybaevtyń kómek kórsetýimen iri gabarıtti vagondardy bergeni úshin 1 mln teńgeden astam soma jáne jumysqa ornalastyrǵany úshin azamattan 100 myń teńge kóleminde para alǵan», - dep málim etti Sybaılas jemqorlyqqa qarsy is-qımyl agenttiginen.

Almaty oblysy Panfılov aýdandyq sotynyń úkimimen birneshe ret para alǵan Untaqbaev 8 jylǵa bas bostandyǵynan aıyryldy. Osy úkimmen Tóleev pen Stamqulova 7 jylǵa, al Qaldybaev 2 jylǵa bas bostandyǵynan aıyrý jazasyna kesildi. Sottalǵandar sondaı-aq ómir boıyna memlekettik qyzmette laýazymdardy ıelený quqyǵynan aıyryldy.