Birneshe ret mas bolyp kólik júrgizgen SQO turǵyny 600 saǵat qoǵamdyq jumysty isteıdi
PETROPAVL. QazAqparat – Soltústik Qazaqstan oblysynda kólikti basqarý quqyǵynan aıyrylsa da rólge qaıta mas kúıde otyrǵan er adamǵa sot úkimi shyqty, dep habarlaıdy QazAqparat tilshisi.
SQO boıynsha qylmystyq atqarý júıesi departamenti baspasóz qyzmetiniń málimetinshe, Petropavl turǵynyn jolda polıtsııa qyzmetkerleri toqtatqan. Saraptama onyń jeńil dárejedegi mas ekendigin kórsetti.
Er adam kinásin sotta moıyndady. Sot jasalǵan qylmystyń aýyrlyǵy ortasha qylmysqa jatatynyn eskere otyryp jáne sottalýshynyń kinásin moıyndaǵanyn, jasaǵan isine shynaıy ókingendigin, sondaı-aq jas balalarynyń bolýyn eskerip jazany jeńildetti.
Sot er adamdy qoǵamǵa joǵary qaýip tóndirmeıdi jáne ony qoǵamnan oqshaýlamaı-aq tárbıeleýge bolady dep sanap, 600 saǵatqa qoǵamdyq jumystarǵa tartý túrindegi jazany taǵaıyndady. Sottalýshy buǵan qosa ómir boıyna kólik basqarý quqyǵynan aıyryldy.
«Sottalǵan Petropavl qalasynyń probatsııa qyzmetine esepke alyndy. Ol qoǵamdyq jumystardan jaltarǵan jaǵdaıda, bas bostandyǵy shekteledi nemese ár istemegen 4 saǵat úshin 1 táýlikke qamaýǵa alynady. Al onyń qoǵamdyq jumystardy ýaqytynda oryndaýyn probatsııa qyzmeti bóliminiń ınspektorlary qadaǵalaıdy», - deıdi SQO boıynsha QAJD bastyǵynyń orynbasary Aleksandr Kochkın.
