Birneshe polıtsııa qyzmetkeri ustaldy

NUR-SULTAN. QazAqparat - Sybaılas jemqorlyqqa qarsy qyzmet elimizdiń birneshe aımaǵynda polıtsııa qyzmetkerleriniń arasyndaǵy sybaılas jemqorlyq faktilerin anyqtady, dep habarlaıdy QazAqparat tilshisi.

Atap aıtqanda, Batys Qazaqstan oblystyq polıtsııa departamenti patrýldik polıtsııasynyń birqatar qyzmetkeri, onyń ishinde vzvody komandıri men polıtsııa kapıtany ustaldy. Olar jol erejesin buzǵan azamattardy ákimshilik jaýapkershilikke tartpaý úshin júıeli túrde para alý kúdigine iligip otyr.

«Vzvod komandıri ustalyp, Oral qalasynyń ýaqytsha ustaý abaqtysyna qamaldy», - dep atap ótedi sybaılas jemqorlyqqa qarsy qyzmetten.

Munan bólek, Shymkent qalasynda jol erejesin buzǵan azamattardy ákimshilik jaýapkershilikke tartpaý úshin 130 myń teńge kóleminde para alǵan qalalyq patrýldik polıtsııa qyzmetiniń polıtsııa leıtenanty kúdikke ilindi.

Al Almaty oblysynda Taldyqorǵan qalalyq polıtsııa basqarmasynyń aǵa tergeýshisi, polıtsııa kapıtanynyń qylmystyq isti toqtatý týraly sheshimdi qabyldaǵany úshin azamattan 50 myń teńge para alýyna qatysy tekserilip jatyr.

Mańǵystaý oblysynda probatsııalyq baqylaýdaǵy tulǵadan jalpy qamqorlyq pen qoǵamdyq jumysqa tarpaýy úshin 60 myń teńge para alý kúdigine ilingen Qylmystyq atqarý júıesi komıtetiniń oblystyq departamenti Munaıly aýdandyq probatsııa qyzmetiniń bólim basshysyna qatysty tergeý júrgizilýde.