Birneshe otbasy Túrkııada oqyp jatqan balalaryn izdep, bizge júgindi - Aıbek Smadııarov

ASTANA. QazAqparat – Keıingi táýlik ishinde Túrkııada balalary oqyp jatqan birneshe qazaqstandyq otbasy Syrtqy ister mınıstrligine júgingen. Bul jaıynda vedomstvonyń resmı ókili Aıbek Smadııarov BAQ ókilderimen ótken brıfıngide aıtty, dep habarlaıdy QazAqparat tilshisi.

«Keıingi táýlik ishinde birneshe otbasy Túrkııada oqyp jatqan balalaryn izdep júgindi. Qazir ol aqparattyń bári tekserilip jatyr. Ázirge naqty eshteńe aıta almaımyn. Óıtkeni, bilesizder, gýmanıtarlyq apat bolǵan kezde jergilikti bılikpen baılanys ornatý boıynsha keıbir qıyndyqtar týyndaıdy. Jalpy, túrik bıligi bizdiń azamattar bar bolsa nemese joq bolsa, ol týraly dereý habarlaıdy. Túrik bıligimen jaqsy baılanys ornatylǵan», - dedi Aıbek Smadııarov.

Sondaı-aq, ol qazaqstandyqtarǵa Túrkııadaǵy týystaryn izdep, ol elge ushyp shyqpaýǵa keńes berdi.

«Eger azamattarymyz Túrkııadaǵy týystaryn óz betimen izdeý úshin shyqqysy kelse, olaı isteýdiń qajeti joq. Óıtkeni, Ystambul qalasynyń áýejaıyndaǵy jaǵdaıdy vıdeodan kórdik. Myńdaǵan adam ushyp shyǵýǵa daıyn júr. Biraq, alǵashqy kezeńde ol jaqta bir jerden birdeńe tabý qıyn bolady. Mamandar osy máselemen aınalysyp jatqandyqtan, kútý kerek. Tipti, olar qıraǵan oryndarǵa jiberilmeýi de múmkin. Óıtkeni, olardyń tıisti biliktiligi joq», - dedi SІM resmı ókili.

Eske salsaq, Túrkııanyń ońtústik-shyǵysynda bolǵan zilzaladan qaza tapqandar sany 2 921 adam ekeni habarlanǵan edi. Sońǵy derekter boıynsha, apatan zardap shekkender sany 3 419-ǵa jetken.

Búgin tańerteń Qazaqstan TJM 41 qutqarýshysy apat saldaryn joıýǵa kómek kórsetý úshin Túrkııaǵa jetti.

Qazirgi tańda Túrkııada qalǵan Qazaqstan azamattaryn Gazıantep qalasynan elge áketý sharalary júrgizilip jatyr. Elge qaıtamyn degen Qazaqstan azamattary 7 aqpan saǵat 12:00-de Gazıantep qalasynyń áýejaıynda tıisti protsodýradan ótip, daıyn bolýy tıis. Sonymen qatar, Qazaqstanǵa oralýǵa nıetti azamattar tizimin jasaý úshin [phone], [phone] telefon nómerlerine habarlasýy kerek.

Aıta ketsek, Qazaqstan Aýyl sharýashylyǵy mınıstrligi Túrkııadaǵy jaǵdaıǵa baılanysty azyq-túlikpen gýmanıtarlyq kómek kórsetýge daıyn ekenin málimdedi.

Al, Qazaqstan qutqarýshylaryn aparǵan bortpen Túrkııadan 16 qazaqstandyq jáne 2 Qyrǵyz Respýblıkasynyń azamaty Astanaǵa jetkiziledi.

Sondaı-aq, Túrkııadaǵy jer silkinisine baılanysty shuǵyl jeli ashyldy.

Foto: gov.kz