Birneshe memlekettiń basshylary Qazaqstan Prezıdentin saılaýdaǵy jeńisimen quttyqtady
Germanııa Prezıdenti Frank-Valter Shtaınmaıer Qasym-Jomart Toqaevqa aldaǵy mańyzdy mindetterin atqarýda tabys, al Qazaqstan halqyna beıbitshilik, erkindik jáne baq-bereke tiledi.
«Qazaqstan halqynyń ıgiligi úshin qolǵa alǵan Sizdiń reformalaryńyz ben jańǵyrý úderisi jańa ókilettik merzimińizde jalǵasady dep senemin. Bul rette Germanııa Qazaqstannyń senimdi seriktesi bolyp qala beredi», – dep jazylǵan jedelhatta.
Italııa Prezıdenti Serdjıo Mattarella óziniń quttyqtaýynda Qasym-Jomart Toqaevqa tolaǵaı tabys tilep, Qazaqstan men Italııany ekijaqty tyǵyz qarym-qatynastar baılanystyratynyn atap ótti.
«Italııa zań ústemdigin nyǵaıtýǵa jáne eldi jańǵyrtýǵa baǵyttalǵan mańyzdy reformalardyń júzege asyrylý barysyn baqylap otyr. Qazaqstan jáne Ortalyq Azııa óńiri úshin turaqtylyq pen damýdyń jarshysy bolatyn bul úderis Eýropalyq Odaqpen qatynastardyń nyǵaıýyna baılanysty da zor mánge ıe», – dep jazdy Serdjıo Mattarella.
Serbııa Prezıdenti Aleksandr Výchıch óziniń quttyqtaýynda Qasym-Jomart Toqaevqa kórsetilgen úlken senim eldiń damý jáne órkendeý baǵytyn jalǵastyrýǵa tyń serpin beretinin atap ótken.
«Serbııa Qazaqstannyń senimdi seriktesi bolyp qala beredi. Sondyqtan Siz jańa prezıdenttik laýazymda bizdiń elge saparmen kelesiz degen úmittemin. Sizdiń saparyńyz ekijaqty qarym-qatynastardy jáne Serbııa men Qazaqstan arasyndaǵy jan-jaqty yntymaqtastyqty nyǵaıtýǵa eleýli úles qosar edi», – dep jazdy Aleksandr Výchıch.
Chehııa Prezıdenti Mılosh Zeman óziniń quttyqtaý jedelhatynda saılaý Qasym-Jomart Toqaevtyń memleket basshysy retindegi berik baǵdaryn rastady jáne azamattardyń oǵan senimi joǵary ekenin kórsetti dep atap ótti.
«Men Sizdi osy jeńisińizben shyn júrekten quttyqtaımyn. Chehııa Respýblıkasy men Qazaqstan Respýblıkasy arasyndaǵy qarym-qatynastyń jyldar boıy dostyq sıpatqa negizdelgenine qýanyshtymyn. Ekijaqty yntymaqtastyq tek ekonomıkalyq salada ǵana emes, basqa da kóptegen baǵytta tabysty damyp keledi», – dep jazdy Chehııa Prezıdenti.
