Birneshe márte urlyq jasaǵan qyzylordalyq ustaldy
Qyzylorda qalasynyń turǵyny polıtsııanyń kezekshi bólimine páter urlyǵy týraly shaǵym túsirdi. Onda belgisiz adamnyń jeke úılerdiń birinde plastıkalyq terezesin ashyp kirip, altyn buıymdaryn urlap ketkeni aıtylǵan. Páter urlyǵy kúndizgi ýaqytta jasalǵan. Sol sátte úıde eshkimniń bolmaǵanyn baıqaǵan kúdikti óziniń aram oıyn júzege asyrǵan. Sonyń saldarynan ol jábirlenýshige jalpy 760 myń teńge materıaldyq shyǵyn keltirgen.
«Odan keıin kúdikti urlanǵan zattardy lombardqa ótkizgeni belgili bolyp otyr. Polıtsııa qyzmetkerleri jedel is-sharalar júrgizdi. Nátıjesinde kúdikti azamat kompıýter klýbtarynyń birinde ustaldy. Qazirgi ýaqytta kúdikti ýaqytsha ustaý ızolıatoryna qamaqqa alyndy. Tergeý barysynda kúdiktiniń qalada jasalǵan osy tektes basqa da bes qylmysqa qatysy bar ekendigi dáleldendi. Barlyq derekter boıynsha Qylmystyq kodeksiniń 188-baby 2-bóliginiń 3-tarmaǵyna sáıkes sotqa deıingi tergep-tekserý júrgizilýde», - dep málim etti Qyzylorda oblystyq polıtsııa departamentiniń baspasóz qyzmeti.
Budan buryn Qyzylorda turǵyny kóshede sholaq myltyq alyp júrgen turǵynnyń qolǵa túskenin habarlaǵan edik.