Birneshe kólikti qasaqana zaqymdaǵan astanalyq ustaldy

NUR-SULTAN. QazAqparat – Elordanyń EKSPO qalashyǵy aýdanynda birneshe kólikti qasaqana zaqymdaǵan er adam ustaldy, dep habarlaıdy QazAqparat tilshisi.

Bul týraly Nur-Sultan qalasy polıtsııa departamentiniń baspasóz qyzmeti málim etti.

«18 qarasha kúni saǵat 00.58-de «102» pýltine belgisiz er qańtarylyp turǵan kólikterdi teýip jatqany týraly habar kelip tústi.

Turǵyndar buzaqyny óz kúshterimen ustap, polıtsııa qyzmetkerlerine tapsyrdy. Ol 30 jastaǵy qala turǵyny bolyp shyqty. Onyń buzaqylyq áreketinen 6 kólikke zaqym kelgen. Olardyń ıeleri polıtsııaǵa júgindi. Zalal somasy anyqtalyp jatyr», -dep jazady departamenttiń baspasóz qyzmeti.

Polıtsııanyń habarlaýynsha, jigittiń qolǵa túsken kezde mas bolǵany saraptama qorytyndysy boıynsha dáleldengen.

«Polıtsııa bólimshesinde jigit óziniń buzaqylyq áreketterine ne túrtki bolǵanyn túsindirip bere almady. Atalǵan fakti boıynsha ustalǵan azamatqa qatysty qylmystyq kodekstiń 293-baby boıynsha sotqa deıingi tergeý amaldary júrip jatyr.

Polıtsııa bótenniń múlkin búldirgeni úshin jaýapkershilik bar ekenin eske salady», -delingen departamenttiń baspasóz málimetinde.