Birneshe iri tótenshe jaǵdaıdyń saldaryn joıǵan Alıma
ASTANA. QazAqparat - Qıyn jáne tótenshe jaǵdaılarda adamdarǵa kúndelikti kómek kórsetetin «kórinbeıtin maıdannyń jaýyngerleri» de bar. Solardyń biri azamattyq qorǵaý podpolkovnıgi Alıma Jamanqulova 16 jyldan astam ómirin órtke qarsy qyzmetke arnaǵan, dep habarlaıdy QazAqparat tilshisi.
Kezekshi-dıspetcherlik qyzmettiń jedel kezekshileri men dıspetcherlerin «kórinbeıtin maıdan jaýyngerleri» dep beker aıtpaǵan. Olardyń jumysy, bir qaraǵanda, kózge kórinbeıdi. Olardy órt sóndirý aımaǵynda, qar qursaýynda, sý tasqynynda avarııalyq-qutqarý jumystaryn júrgizý kezinde kórmeısiz. Biraq dál osy áıelder órt sóndirý qyzmetiniń «qulaǵy», «qoly» jáne «júregi» ekendigin barlyǵy biledi.
Solardyń biri Shymkent qalalyq tótenshe jaǵdaılar departamentiniń qyzmetkeri Alıma Syzdyqbekqyzy qyzmet atqarý barysynda birneshe ret iri tótenshe jaǵdaılardyń saldaryn joıýǵa qatysty. Dál osy názik jannyń táýliktik kezekshiligi ýaqytynda, 2016 jyly «Munaı BK» AQ aýmaǵynda benzıni bar tsısternalar, Qorǵasyn stansasynda tsısternalar janyp, 2017 jyly «Shymkent Munaı Ónimderi» AQ aýmaǵynda órt boldy.
Onyń jedel den qoıýy men saýatty áreketiniń arqasynda barlyq apattyq-qutqarý qyzmetterin habarlandyrylyp, ózara is-qımyl men úılestirilýi naqty uıymdastyryldy. Sondaı-aq tótenshe jaǵdaı ornyna órt sóndirý poezdary der ýaqytynda jiberildi, Nátıjesinde órttiń basqa rezervýarlarǵa, tsısternalarǵa jáne jaqyn ornalasqan turǵyn úılerge taralýyna jol berilmedi.
Alıma Jamanqulovanyń jumysyna degen qushtarlyǵy, súıispenshiligi men asqan dáldigi joǵary basshylyqtyń da nazarynan tys qalmady. Ol «Minsiz qyzmeti úshin» medalymen, «QR ІІM TJK 20 jyl», «QR ІІM 25 jyl», «Órtke qarsy qyzmetke 100 jyl» mereıtoılyq medaldarymen marapattaldy.
