Birneshe eldiń ýrologtary elordadaǵy forýmda bas qosty
NUR-SULTAN. QazAqparat - Elordada І Astanalyq ýrologııalyq forým ótip jatyr, dep habarlaıdy QazAqparat tilshisi.
6-8 maýsym aralyǵynda ótetin sharaǵa Qazaqstan, Germanııa, Reseı jáne Grýzııa elderiniń bilikti ýrologtary shaqyrylǵan. Olar 3 kún boıy salanyń ózekti máselelerin talqylap, jańa tehnologııa dáýirinde basymdyq beriletin baǵyttardy anyqtamaq. Mamandar sektsııalar barysynda laparoskopııa, rekonstrýktıvti ýrologııa, endoskopııalyq ýrologııa, andrologııa salalary boıynsha tájirıbe almasatyn bolady.
Forýmnyń ashylýynda sóılegen Qazaqstan ýrologtar qaýymdastyǵynyń prezıdenti Myrzakárim Alshynbaev Túrkistan qalasynda túrki elderi ýrologtarynyń kongresi ótetinin habarlady.
«Álemde túrkitildes 26 memleket pen ulys bar. Solardyń barlyǵynan bilikti ýrologtar kelip, salanyń ózekti máselelerin talqylamaqshy. Qyrkúıek aıynda sol sharaǵa bárimiz bir adamdaı atsalysýymyz kerek. Ol sharanyń otandyq ýrologııanyń damýyna bereri kóp», - dedi professor.
Astana medıtsınalyq ýnıversıtetiniń rektory Daınıýs Pavalkıs eldegi ýrologııa ilimi sala-salaǵa bólinip, árqaısysy derbes damyp jatqanyn atap, tutastyq qajet ekenin jetkizdi.
«Ýrologııa salasy birtutas bolýy shart. Medıtsınasy damyǵan elderde onkologııalyq ýrologııa, laparoskopııalyq ýrologııa degen bólek-bólek uǵym joq. Qazaqstan dárigerleri statsıonarlyq jáne emhanalyq maman dep bólinbeýi kerek dep oılaımyn. Sonda ǵana salada birtekti damý bolady», - dedi rektor.
