Birneshe áıel adamdy óltirgen ózbekstandyq eki qylmysker qolǵa tústi
ASTANA. 10 mamyr. QazAqparat -Ońtústik Qazaqstan oblysynyń krımınaldyq polıtsııa qyzmetkerleri Ózbekstan men Qazaqstan aýmaǵyndaǵy qylmystarǵa júıeli taldaý jasaı otyryp,
jedel-izdestirý jáne arnaıy is-sharalar kesheni nátıjesinde 26 jastaǵy Ózbekstan Respýblıkasynyń eki azamatyn quryqtady. Atalǵan eki qylmysker eki el aýmaǵynda birneshe áıeldi óltirgen bolyp otyr. Bul týraly búgin QR Іshki ister mınıstrliginde ótken brıfıng barysynda vedomstvo baspasóz qyzmetiniń jetekshisi Nurdildá Oraz málim etti.
N. Orazdyń aıtýynsha, ustalǵandardyń ótken jyldyń jeltoqsany men bıylǵy naýryz aıy aralyǵynda oblystyń 25-54 jas aralyǵyndaǵy 4 áıel turǵynyn óltirýge qatystylyǵy jedel túrde dáleldendi. Onyń sózine qaraǵanda, qylmyskerler júzege asyrǵan barlyq qylmys bir ádispen jasalǵan jáne býyndyrylyp óltirilgen áıelder denesi «Almaty-Tashkent» avtojolynynyń jol jıeginde tabylǵan.
«Qylmyskerler eki jábirlenýshige taksı qyzmetin usynyp, temir jol vokzalynan kútip alǵany anyqtaldy. Osylaısha, ótken jyldyń jeltoqsan aıynda olar Qaraǵandydan Shymkentke kelgen 28 jastaǵy jábirlenýshi áıelge taksı qyzmetin usynyp, keıin kúdik týǵyzbas úshin jol boıynan úshinshi «qyzmettesterin» otyrǵyzady. Qylmyskerler jábirlenýshini býyndyryp, tonaǵan, al denesin jol jıegine laqtyryp ketken», - deıdi resmı ókil.
Onyń aıtýynsha, jábirlenýshilerden urlanǵan baǵaly zattardy qylmyskerler Tashkent qalasynyń bazarynda satqandyǵy anyqtaldy.
«Sonymen qatar, ustalǵan qylmyskerler Tashkent qalasy men Tashkent oblysynyń aýmaǵynda ótken jyldyń qarashasy men jeltoqsan aılary aralyǵynda 7 áıeldi óltirgen 44 jastaǵy Ózbekstan azamatymen baılanysta bolǵan degen kúdik bar. Búgingi tańda qylmystyq iske qatysy bar degen kúdikpen úshinshi adamdy izdestirý jáne ustaý boıynsha jedel-izdestirý sharalar kesheni ótip jatyr», - deıdi N. Oraz.
