Birneshe adamnyń ólimine qatysy bar lańkes polıtseı qaza boldy
ASTANA. 13 aqpan. QazAqparat - Úsh adamnyń ólimine qatysy bar degen kúdikpen izdeýde júrgen burynǵy polıtsııa qyzmetkeriniń izine túsken arnaıy jasaq ony Kalıfornııa taýyndaǵy bir lashyqtan taýyp aldy.
Bul jaıynda Los Angeles Times gazeti óziniń Tvıtterdegi paraqshasynda habarlady.
muslim.kz saıtynyń jazýynsha, ótken aptada belgili bolǵandaı, 33 jastaǵy Krıstofer Dorner polıtsııa men áıeldiń jáne onyń tanystarynyń ólimine qatysy bar kúdikti retinde tanylǵan bolatyn. 10 aqpan kúni bılik oryndary onyń qaıda jasyrynǵanyn habarlaǵan adamǵa bir mıllıon dollar beretinin jarııa etti.
Polıtsııa men kúdikti atalmysh shtattyń ońtústiginde ornalasqan San-Bernardıno okrýgindegi Bıg-Ber kóliniń mańynda seısenbi kúni qaqtyǵysyp qaldy. Qaladaǵy úıdiń birin úptep, qojaıynyn óltirip, mashınasyn aıdap ketken soń ǵana polıtsııa qylmyskerdiń izine túsken edi. Sońyna túsken polıtsııa qyzmetkerlerinen qashqan Dorner shańǵy kýrorty ornalasqan taýǵa jasyrynyp, sondaǵy bir kúrkede boı tasalaıdy. Atystan okrýg sherıfiniń eki birdeı kómekshisi jaralanyp, onyń bireýi ońala almaı, qaza tapty. Atys kezinde kúrke otqa oranyp, kúli ǵana qalady. Qylmyskerdiń jansyz denesi kúli qalǵan kúrkeniń ornynan tabylǵan.
Kúdikti 2005-2008 jyldar aralyǵynda ózi jumys istegen Los-Andjeles polıtsııa departamentine bireýdiń jalǵan sózine erip, ózin qyzmetten qýǵany úshin kek alatynyn baıandap, hat joldaıdy. Hatta, birneshe polıtsııanyń aty-jónin de atap, olardy tiri qaldyrmaıtynyn jazǵan eken. Basylym keltirgen derekke qaraǵanda, qylmyskerdiń qoqan-loqqysynan keıin saqtyq sharalary kúsheıtilip, quqyqqorǵaý organdarynyń 50 qyzmetkeri men onyń otbasylaryna kúzet qoıylǵan. Qylmyskerdiń jansyz denesi kimdiki ekeni anyqtalmaıynsha, ıaǵnı, Dornerdiki ekenine kóz jetkizbeıinshe, olarǵa qoıylǵan kúzet alynbaıtyn boldy.
