Bırmıngemde polıtsııa adamdarǵa pyshaq ala júgirgen er adamdy izdep jatyr
NUR-SULTAN. QazAqparat – Brıtanııalyq polıtsııa jeksenbige qaraǵan túni eki saǵat boıy Bırmıngem ortalyǵynda kóshedegi adamdarǵa pyshaq ala júgirgen er adamdy izdeý jumystaryn júrgizip jatyr.
Osy oqıǵanyń saldarynan bir adam qaza taýyp, jeti adam jaraqat aldy. Polıtsııa bul shabýyldyń lańkesttikke qatysy joq ekendigin aıtyp otyr. Bul týraly QazAqparat BBC -ge silteme jasap habarlaıdy.
Polıtsııanyń habarlaýynsha, birinshi shabýyl jergilikti ýaqytpen saǵat 00:30-da jasaldy. Odan keıin pyshaq ustaǵan er adam qalanyń ońtústigine qaraı júrgen. Saǵat 02:20 shamasynda ol Herst-strıt kóshesiniń janynda adamdarǵa jaraqat salǵan.
Jeksenbiniń keshinde polıtsııa shabýylǵa kúdikti dep tanylǵan er adam túsip qalǵan syrtqy baqylaý kameralarynyń kadrlaryn jarııalady.
Polıtsııa ókilderi shabýyldaýshynyń aldynan kezikken kez-kelgen adamdy pyshaqtaı bergenin, ıaǵnı onyń áreketterinen lańkestik belgileri joq ekenin aıtyp otyr. Budan bólek, olar bul shabýyldyń krımınaldyq toptardyń qaqtyǵysymen nemese jappaı tártipsizdikpen baılanysty ekendigin rastaıtyn kýágerlerdiń joq ekenin aıtady.
«Búgin túnde adam shoshytarlyqtaı sumdyq oqıǵa boldy. Bul kezdeısoq adamdarǵa jasalǵan shabýyl, sebebi biz qurbandardyń arasynda eshqandaı baılanys joq», - dedi Bırmıngem polıtsııasynyń aǵa sýperıntendanty Stıv Grem.
Atalǵan faktige qatysty adam óltirý áreketi boıynsha qylmystyq is qozǵaldy jáne oǵan bir ǵana adam kúdikti bolyp otyr.
Pyshaq jaraqaty saldarynan 23 jastaǵy er adam qaza boldy. Budan basqa, 19 jastaǵy boıjetken men 32 jastaǵy er adam aýyr jaraqat alǵan, 23-33 jas arasyndaǵy taǵy bes adam jeńil jaraqattandy.
