Birliktiń, yntymaqtyń, eldiń ishi men syrtynyń bútindiginiń arqasynda jetistikterge qol jetkizdik - N.Nazarbaev
ASTANA. 4 sáýir. QazAqparat /Marlan Jıembaı/ - "Birliktiń, yntymaqtyń, eldiń ishi men syrtynyń bútindiginiń arqasynda jetistikterge qol jetkizdik", - dedi Elbasy Nursultan Nazarbaev búgin túnde elordadaǵy saılaýaldy shtaby ornalasqan «Nur Otan» HDP-nyń Ortalyq apparatyna kelip, óz jaqtastary men nıettesterimen birge QR Ortalyq saılaý komıssııasy jarııalaǵan QR Prezıdentiniń kezekten tys saılaýynyń aldyn ala málimetterin tyńdaý barysynda.
Memleket basshysy óz sózinde elimizde birqatar sharýalardyń atqarylyp, ındýstrııalyq-ınnovatsııalyq damý, áleýmettik jańarý syndy baǵdarlamalardyń júzege asyrylyp jatqandyǵyn atap ótti. Osy oraıda atqarylyp jatqan isterdiń barlyǵynyń árbir qazaqstandyq qarapaıym adamnyń shańyraǵyna jaqsylyq ákelý baǵytynda jasalatyndyǵyn basa aıtty. «Soǵan, ary qaraı eldi bastap, halyqty uıymdastyryp júre ber degen saıasatqa qoldaý kórsettińizder. Birliktiń arqasynda, tynyshtyqtyń arqasynda, eldiń ishi men syrty bútinniń arqasynda biz osyndaı jetistikterge qol jetkizdik», - dedi N.Nazarbaev.
Osydan keıin sóz alǵan «Nur Otan» HDP Tóraǵasynyń birinshi orynbasary Nurlan Nyǵmatýlın Elbasyn barlyq shtab músheleriniń, senimdi ókilder men fılıal qyzmetkerleriniń atynan saılaýdaǵy jeńisimen quttyqtaı kelip: «Asa qurmetti Nursultan Ábishuly! Táýelsiz Qazaqstanymyzdyń negizin qalaýshy jáne Elbasy, Sizdi, mıllıondaǵan jaqtastaryńyzdyń atynan búgingi uly jeńispen, jalpy Qazaqstannyń jeńisimen shyn júrekten quttyqtaýǵa ruqsat etińiz!», - dedi.
