«Birlik jańa jetistikter men jeńisterge bastaıdy» - respýblıkalyq basylymdarǵa sholý

***

Keshe Ystambuldaǵy "Chıragan Kempınskı" qonaq úıinde Túrkitildes memleketter basshylarynyń H sammıti boldy, onyń jumysyna Qazaqstan Respýblıkasynyń Prezıdenti Nursultan Nazarbaev qatysyp, sóz sóıledi. Osyǵan oraı «Egemen Qazaqstan» gazetinde «Birlik jańa jetistikter men jeńisterge bastaıdy» degen taqyryppen kólemdi maqala basyldy. «Búgingi sammıt Túrki keńesiniń ınstıtýttyq qalyptasýyna jańa serpin beredi degen senimdemin. Bizdiń aldymyzda Túrki keńesi Hatshy­ly­ǵynyń qurylýy, Aqsaqaldar alqasy týraly erejeniń qabyldanýy, Túrki álemi akademııasynyń naqty ju­mysqa kirisýi sııaqty jalpy túrkilik qurylymdardy odan ári damytý mindeti tur. Byltyr Nahchyvan sam­mıti kezinde biz Túrki álemi aka­demııasyn ashý jóninde ıgi bastama kótergen edik. Osy akademııanyń tusaýkeser rásimi mamyr aıynyń aıa­ǵynda Astanada ótkizildi. Halyq­aralyq mártebege ıe bolatyn bul akademııa jumysy túrkitildes ha­lyqtardyń tamyrlas tarıhyn zer­deleýge jáne ortaq mádenıetin damytýǵa jumyldyrylady. Osyǵan oraı, jalpy túrkilik órkenıettiń órkendeýine múddeli barsha me­ke­meler men ǵalymdardy akademııa­nyń jumysyna belsene atsalysýǵa shaqyramyn», dedi N.Nazarbaev.

Premer-Mınıstr Kárim Másimov Almaty oblysynyń Jarkent óńirindegi Qorǵas aýylyna kelip qaıtty. Úkimet basshysynyń resmı issapary eki el shekarasynda salynyp jatqan "Qorǵas" halyqaralyq shekaralyq áriptestik ortalyǵyndaǵy qurylys jumystarynyń barysymen tanysýǵa arnaldy. Úkimet basshysynyń bul sapary jaıynda «Egemen Qazaqstan» gazetiniń búgingi sanyndaǵy «Basty talap - básekege qabilettilik» degen maqalada tarqatyla baıandalǵan. «"Qorǵas" erkin ekonomıkalyq aımaǵy birneshe bólimnen turatyn bolady. Munda úlken kólik ter­mı­naly, saýda kórmesi, kelgen adam­dar ashyq aspan astyna shyqpaı jalǵastyra aralaıtyn saýda pa­vılon­dary, bir mezette 5 myń adam qabyldaýǵa múmkindigi bar qo­naqúı kesheni salynady. Halyq­aralyq qarjy jáne óndiristik uıymdardyń iri halyqaralyq kez­desýlerin, konferentsııalaryn, sımpozıýmdaryn ótkizýge arnalǵan ortalyq salynbaqshy. Ofıster men meıramhanalar, kazıno, kıno­teatr, kóp qabatty turǵyn úıler, mektep pen balabaqsha, kelýshiler demalatyn basqa oryndar jaıy da oılastyrylǵan», dep jazady basylym.

«Taıynsha aýdanynda taǵy bir ıgi is ómirge keldi. Abaı aýyldyq okrýginde kókónis ósirýmen aınalysatyn "Astyq-STEM" JShS tamshylatyp sýarý ádisin qoldana bastady. Bul tásil oń­tústik jaq úshin tańsyq bolma­ǵanmen teriskeı óńirde kenjeleý damyp kele jatqany jasyryn emes», dep jazady «Egemen Qazaqstan» gazeti. Sergeı Zvolskıı basqara­tyn sharýashylyq eginshilikpen kópten beri aınalysady. 5 myń gektarǵa bıdaı, 2 myń gektarǵa zyǵyr, 1,5 myń gektarǵa raps, 120 gektarǵa kartop egedi. Aýa raıy­nyń kúrdeliligine qaramastan, bıyl ónim táýir shyqty.

***

«Tań ata Astanadaǵy Táýelsizdik saraıynyń aldyndaǵy «Qazaq eli» monýmenti alańyna qyzyl saýytty kólikter qaptady, arnaıy kók kombınezondy, aq, qyzyl, sary, kók telpekti adamdar jantalasa júgirip, sap túzedi. Olardyń qasyna qazaq «jeti qazynanyń biri» retinde qasıet tutatyn, búkil ómirin adam balasyna baǵyshtaǵan janýar - tóbetter de satyly laýazym saqtaýǵa úırengenderin pash etip, tura-tura qalysty. Sońynan alańda elimizdegi apattarmen kúresetin «bas maman» kórindi. Osylaısha, keshe elordada Tótenshe jaǵdaılar mınıstrligi qazaq eliniń bas qalasynda ashylatyn qurlyq elderi kóshbasshylarynyń uly quryltaıyna daıyndyqty bastap ketti», dep jazady «Aıqyn» gazeti juma kúngi sanynda jaryq kórgen «Uly quryltaı qaýipsiz ótýi tıis» degen taqyryppen basylǵan maqalasynda. Tótenshe jaǵdaılar mınıstrliginiń dereginshe, EQYU sammıti syndy joǵarǵy deńgeıdegi salmaqty saıası jıyn men Azıada - 2011 syndy qurlyqtyq sport dýmanyna daıyndyq tekserilgen keshegi arnaıy taktıkalyq jattyǵýlar "Qazqutqarý - 2010" qutqarý bólimsheleriniń 15-halyqaralyq jıyny-semınary aıasynda uıymdastyrylǵan. Sonymen qatar keshe V.Bojkonyń baılanys arqyly basshylyǵymen, Almaty qalasy men Almaty oblysynda da 2011 jylǵy VІІ qysqy Azıada oıyndaryna jumyldyrylǵan nysandarda taktıkalyq oqý-jattyǵý ótkizilgen.

«Aıqyn» gazetiniń jazýynsha, ózderin jergilikti turǵyndarǵa «emshilermiz» dep tanystyryp, aram pıǵyldy is-áreketterin júzege asyryp kelgen ózbekstandyq tórt kelinshekti araldyq polıtseıler qolǵa túsirdi. Bul jaıynda basylymnyń búgingi nómirindegi «Emshimiz» dep eldi aldaǵandar» degen maqalada keńinen baıandalǵan. «Ózbek kelinshekter ózderiniń qyzmetin 20 - 40 myń teńgege baǵalapty. Turǵyndardyń qaısybiri suraǵan aqshasyn berse, endi bireýleri altyn júzikteri men syrǵalaryn, tipti uıaly baılanys telefondaryn berip eseptesipti. Talaılardy san soqtyrǵan jalǵan emshilerdi Aral qalasynyń jol polıtseıleri kóshede qaıyr surap júrgen sátinde quryqtady. Qazirgi kúni talaıdy qapy qaptyrǵan tórt kelinshektiń ústinen qylmystyq is qozǵaldy», dep jazady basylym.

Ótken jyly qyrkúıektiń 11-inde keshki jumys aıaqtalar ýaqytta Jaıyq ózeni arqyly eki qurlyqtaǵy Baımuhanov pen Mechnıkov kóshelerin baılanystyrý maqsatynda qurylysy júrip jatqan jańa kópirdiń 900 tonna salmaqty quraıtyn bir bóligi ózenge qulap túsken bolatyn. Apattyń saldarynan jumysshylardyń segizi izim-qaıym sý astynda joq bolyp, bireýi ortasha dene jaraqatyn alyp, aýrýhanaǵa jetkizilgen edi. Osy qaıǵyly tótenshe oqıǵa qatysty qozǵalǵan qylmystyq iske sońǵy núkte qoıylyp, jazalylarǵa sot kesimin aıtty. Bul jaıynda «Aıqyn» gazetindegi «Kópir «qulatqandarǵa» bir jyldan soń úkim shyqty» degen maqaladan egjeı-tegjeı oqı alasyzdar.

***

«Dál qazir fýtbolymyzdyń kejegesi keıin tartyp, sportsúıer qaýym úshin ózekti máselege aınalyp tur. Ulttyq quramanyń súreńsiz oıyndary bir-birine sabaqtasyp, serpin alar sıqy joq. Al ulttyq qurama tizginin senip tapsyrǵan nemis mamany Bernd Shtork pen Qazaqstan fýtbol federatsııasy ulttyq qurama oıynyn jetildirýdiń «tóte» jolyn tapqan bolyp, qareket jasaýda», dep jazady «Alash aınasy» gazeti. Maqalanyń tolyq nusqasyn basylymnyń juma kúngi nómirindegi «Jankúıerler depýtattarǵa jaltaqtaıdy» degen taqyryptan oqı alasyzdar.

Osy basylymnyń turaqty «Dat!» aıdarynda saıasattanýshy Erlan Qarınmen aradaǵy suhbat «Qazaqstan EQYU-nyń umytylyp bara jatqan qaǵıdattaryn qaıta jańǵyrtty» degen taqyryppen berilgen. «Alash aınasy» gazetiniń barlyq saýaldaryna tuşymdy jaýap bergen ol «qyrǵyz da qazaq sekildi táýelsizdikti bir ýaqytta ıelengen el. Biraq sonyń baqytyn seze almaı, qyrqysýdyń saldarynan egmendikten aıyrylý aldynda tur. Qazirgi kórshimiz «ydyrap bara jatqan el» atandy. Osynyń bári postkeńestik elıtalarǵa úlken sabaq bolsa ıgi. Buǵan deıin biz «saıasatkerler qatelik jasasa, olar múlkinen, «kreslosynan», bas bostandyǵynan aıyrylyp qalýy múmkin» dep oılap keldik. Biraq myna zaman saıasatkerdiń qateliginen bútkil bir el memlekettiginen aıyrylyp qalýy múmkindigin kórsetýde. Sol úshin Táýelsizdiktiń qadirin bil, Alash balasy!», deıdi.

***

«Kazahstanskaıa pravda» gazetiniń jazýynsha, keshe Astanadaǵy Qazaq Gýmanıtarlyq-Zań ýnıversıtetinde QR Prezıdenti Hattamasynyń burynǵy bastyǵy, «Bolashaq» stıpendıattary qaýymdastyǵy keńesiniń tóraǵasy Baýyrjan Baıbektiń «Qazaqstan Respýblıkasynyń memlekettik hattamasy» atty kitabynyń tanystyrylymy boldy. «Qazaqstan Respýblıkasynyń memlekettik hattamasy» atty kitap arqyly elimizdiń táýelsizdik jyldarynda júrip ótken jolyn taldaýǵa, memlekettik hattama týraly, dıplomatııalyq hattama men ádep jóninde tolyqqandy teorııalyq materıal berýge talpynys jasadyq», depti basylym avtory.