Birlik pen turaqtylyq maqsatqa jetýimizdiń basty alǵysharttary

ASTANA. QazAqparat - Memleket basshysy Nursultan Nazarbaevtyń tóraǵa­lyǵymen Qaýipsizdik Keńesiniń otyrysy ótti, dep habarlady Prezıdenttiń baspasóz qyzmeti.

Jıynda bıylǵy 5-6 maýsymda Aqtóbe qalasynda oryn alǵan oqıǵaǵa baǵa berilip, eldegi qaýipsizdikti qamtamasyz etý jónindegi is-sharalardyń tizbesi anyqtaldy. Sondaı-aq, Bas prokýror J.Asanovtyń, Іshki ister mınıstri Q.Qasymovtyń, Ulttyq qaýipsizdik komıtetiniń tóraǵasy V.Jumaqanovtyń jáne Aqtóbe oblysynyń ákimi B.Saparbaevtyń baıandamalary tyńdaldy.

Qazaqstan Prezıdenti qaza bolǵan áskerı qyzmetshiler men elimizdiń beıbit turǵyndarynyń týǵan-týystary men jaqyndaryna keńes músheleriniń jáne jeke óziniń atynan kóńil aıtty. Qaza bolǵandardyń otbasylaryna memleket tarapynan jan-jaqty kómek kórsetiletini atap ótildi.

Nursultan Nazarbaev qylmys­ker­lerge qatysty áreketterdi qoldaǵany jáne keshegi Ulttyq aza tutý kúninde birlik kórsetkeni úshin barsha qazaqstandyqtarǵa alǵys aıtty.

Memleket basshysy polıtsııa, Ulttyq ulan, arnaýly bólimsheler qyzmetkerlerine terrorısterge laıyqty qarsy tura bilgenderi úshin rızashylyq bildirdi.

Qazaqstan Prezıdenti jasalǵan shabýyldardy mánsiz jáne zulym áreket retinde atap ótti.

- Munyń dástúrli emes salafızm dinı aǵymy jolyn us­taný­shylar tobynyń terrorıstik shabýyly ekenin biz qazir bilip otyr­myz. Respýblıkada din ustaný bos­tandyǵyna kepildik bere otyryp, biz dinniń atyn jamylyp eldegi jaǵ­daıdy ýshyqtyrýshylardyń barlyǵyna qatań toıtarys berý nıetindemiz, - dedi Memleket basshysy.

Nursultan Nazarbaev terro­rıs­terdiń josparyna qaramastan, beıbit halyq arasynda kóp adam shyǵynyna jol berilmegenine nazar aýdardy.

- Kúsh qurylymdarynyń áre­keti qylmyskerlerdiń túgelge jýy­ǵynyń kózin joıýǵa múmkindik berdi, birnesheýi izdestirilýde. Biz­diń quqyq qorǵaý organdarymyz bar­lyǵyn tabady dep oılaımyn, olar tıisti jazasyn alatyn bolady. Terrorıstik aktiler qoǵamnyń kóńil-kúıin ózgertti, halyq olardy ádil aıyptap, batyl áreket kútedi, - dedi Qazaqstan Prezıdenti.

Osy oraıda Memleket basshysy ulttyq qaýipsizdikti qamtamasyz etýge baǵyttalǵan strategııalyq jáne júıeli sıpattaǵy birqatar tapsyrmalar berdi.

Atap aıtqanda, Qazaqstan Prezıdenti Úkimetke eki aıdyń ishinde terrorızm men ekstremızmge, qarý aınalymy men ony saqtaýǵa jáne satýǵa qarsy áreket etý salasyndaǵy, kóshi-qondy jáne dinı birlestikterdi retteý salasyndaǵy zańnamalyq bastamalar jıyntyǵyn ázirleýdi tapsyrdy.

- Halyqaralyq terrorıstik uıymdarǵa qatysy bar Qazaqstan azamattaryn jazalaý sharalaryn kúsheıtý máselesin qaras­tyrǵan jón. Bul rette, olar memle­ketimizdiń múddesine satqyndyq jasap, óz Otanyna qarsy soǵys jo­lyna túsip otyrǵanyn eskerý qajet. Budan bólek, terrorıstik qaýip jónindegi dabyl boıynsha ótkizilýi yqtımal arnaýly shu­ǵyl sharalar uıymdastyrý jeńil­detilsin. Osy zańnamalyq basta­malardyń barlyǵyn bıylǵy zań shyǵarý jumysy josparyna engizý qajet, - dedi Memleket basshysy.

Nursultan Nazarbaev bolyp ótken oqıǵalar áleýet qury­lym­darynyń jumys tásilderin túbirimen qaıta qaraý qajettigin kórsetkenin aıtty.

- Zańnamamyzdy qataıtyp, osy salaǵa qatysty qabyldanǵan baǵdarlamalarǵa taldaý júrgizetin jáne tıisti ózgerister engizetin kez keldi,  - dedi Qazaqstan Prezıdenti.

Memleket basshysy AQSh, Izraıl, Germanııa jáne ózge de birqatar shet memleketterde shet­ten keletin qarajattyń paı­da­la­nylýynyń jarııalylyǵyn qam­ta­masyz etýge baǵyttalǵan túr­li tá­silder qoldanylatynyn atap ótti.

- Úkimet osy tájirıbeni qa­rastyryp, Qazaqstanda bizdiń azamattar men uıymdardyń shetelderden qarjylandyrylý isiniń monıtorıngin engizýge qatysty usynystar berýi qajet, - dedi Nursultan Nazarbaev.

Qazaqstan Prezıdenti qarýdyń barlyq túrine elimizde tyıym salý jóninde qoǵamda kóterilip otyrǵan másele mundaı  radıkaldy sharalardy qoldanbaı-aq qaýipsizdikti qamtamasyz etý múmkindigi turǵysynan muqııat zertteýdi qajet etetinin aıtty.

- Zańnamalyq turǵydan qarý aınalymyn, ony saqtaý tártibin qadaǵalaý kúsheıtilsin, bul tártipti buzǵany úshin jaýapkershilik qataıtylsyn, osy qyzmetpen aınalysatyn barlyq sýbektilerge keshendi tekseris júrgizilsin. Іshki ister mınıstrligi tez ári ruqsatsyz qoldanýǵa jaramdy qarýdy satýǵa tyıym salatyn, sondaı-aq, qarý, oq-dári jáne jarylǵysh zattar saqtalatyn nysandar kúzetine qoıylatyn biliktilik talaptaryn kúsheıtýdi qamtamasyz etýge arnalǵan ózgeristerdi qajet bolǵan jaǵdaıda bir aı merzim ishinde zańnamaǵa engizsin. Budan bólek, kóppáterli úılerde emes, arnaýly ǵımarattarda bolýǵa tıis qarý-jaraq dúkenderiniń ornalasqan jerleri anyqtalsyn, - dedi Memleket basshysy.

Nursultan Nazarbaev baqy­laý­syz kóshi-qonnyń, jerdi óz beti­men basyp alǵandardyń zańsyz qonystarynyń qylmys úshin qolaıly ortaǵa aınalyp otyr­ǵanyna nazar aýdardy.

- Úkimet zamanaýı tehno­lo­gııalarǵa negizdelgen ıntegral­danǵan mıgratsııalyq baqylaý júıesin qurý jumysyn tezdetip, daktıloskopııalyq tirkeý týraly zań jobasyn ázirleýge kiri­sýi kerek. Oǵan deıin  halyqty tirkeýge qoıý jáne esepke alý mehanızmderin oryndaý qam­tamasyz etilsin. Barlyq ákimderge osy jumysty júrgizip, árbir jarty jyl saıyn ol týraly baıandap otyrýdy tapsyramyn. Elimizge keletin bosqyndardyń mindetti túrde tirkeýge turý múmkindigin qarastyrǵan jón. Osy aıtylǵannyń bári zańdar men basqa da normatıvtik-quqyqtyq aktilerde kórinis tabýy kerek. Bul eldegi qaýipsizdik pen qoǵamdyq tártiptiń múddesi úshin júzege asyrylady. Úkimet Іshki ister mınıstrligi janynan mıgratsııalyq úderisterdi baqylaý men retteý jáne osy salada taldaý júrgizý isine jaýap beretin Kóshi-qon máseleleri jónindegi ulttyq bıýro qurý jumysyn tezdetkeni jón, - dedi Qazaqstan Prezıdenti.

Memleket basshysy Aqtóbe­degi oqıǵalar mańyzdy mekeme­ler­diń, halyq kóp jınalatyn nysan­dardyń kúzetin kúsheıtý qajettigin de kórsetip bergenin atap ótti.

- Barlyq áýejaılardy, avtovokzaldar men temirjol vokzaldaryn ózge elderdegideı zamanaýı tekserý júıelerimen, aýlalardy sapaly beınebaqylaý quraldarymen jabdyqtaǵan jón. Bul sharalardyń biri de azamattarǵa qolaısyzdyq týǵyzbaýy kerek, - dedi Memleket basshysy.

Qazaqstan Prezıdenti terro­rıstik akt jáne tótenshe jaǵdaı oryn alǵan kezde jasalatyn is-áreketterdiń halyqqa túsinikti algorıtmin ázirleý qajettigine  nazar aýdardy.

- Árbir úlken qalada mindetti túrde halyqty dereý qulaqtandyrý júıesi jumys istep turýǵa tıis, - dedi Qazaqstan Prezıdenti.

Nursultan Nazarbaev ás­ke­rı qalashyqtardy, áskerı bólim­derdi, oq-dári men qarý-jaraq saqtalatyn oryndardy qosa al­ǵanda, barlyq áskerı nysandardy qorǵaý sharalaryna aıryqsha kóńil bólý kerektigin atap kór­setti.

Memleket basshysy halyqpen jumys júrgizý isin túbegeıli jaqsartý kerektigin aıtty.

- Árbir jumyssyz adam bizdiń esebimizde bolýǵa tıis. Densaýlyq saqtaý jáne áleýmettik damý mınıstrligi ákimdiktermen birlese otyryp, ár adammen jeke jumys júrgizip, eki aı merzim ishinde halyqtyń osy bóligin jumyspen qamtý jóninde usynystar engizýi tıis. Qajet jaǵdaıda Eńbek kodeksine tıisti ózgerister engizý jóninde bastamalar usyný kerek, - dedi Nursultan Nazarbaev.

Qazaqstan Prezıdenti polıtsııa qyzmetkerlerimen halyqtyń qarym-qatynasy zańnama arqyly aıqyn reglamenttelýi tıistigine nazar aýdardy.

-  Polıtseılerge shabýyl jasaý, qurmettemeýshilik fakti­leri­niń barlyǵyna quqyq qorǵaý júıe­si tarapynan qatań quqyqtyq baǵa berilýge tıis. Qajet bolǵan jaǵ­daıda zańdarǵa ózgerister engizgen jón. Forma kıgen adam memlekettiń aıryqsha qorǵaýynda bolýy kerek, qyzmettik mindetin oryndaý barysynda onyń ómirine qol suǵylmaýshylyqtyń qamtamasyz etilýine  kepildik berilýge tıis. Bul rette polıtsııa ókiliniń ózi de soǵan saı bolýy kerek. Osyǵan baılanysty barlyq qoǵamdyq ınstıtýttardy, azamattyq qoǵamdy quqyqtyq tártipti saqtaý organ­daryna qoldaý kórsetýge, el qaýip­sizdigine barynsha úles qosýǵa sha­qy­ramyn, - dedi Memleket basshysy.

Nursultan Nazarbaev qyl­mys­pen kúresý úshin barlyq qajetti resýrsty bólý kerek ekenin aıtty.

- Nege biz mundaı sharalar qol­danýǵa májbúr bolyp otyr­ǵanymyzdy azamattarymyz durys túsinedi dep oılaımyn. Elimizdegi tynyshtyq pen turaqtylyq - memlekettiń damýy úshin jáne biz barlyq  maqsatymyzǵa jetýi­miz úshin qajetti basty shart. Biz bul aıtylǵan sharalarmen shek­tel­meımiz. Jaqyn arada ózge máseleler boıynsha da keshendi sheshimder qabyldanatyn bolady. Sózimdi Qazaqstannyń barlyq azamattaryna arnaımyn - bizdiń elimizde tynyshtyq pen turaqtylyqtyń saqtalýy qamtamasyz etiledi. Ol úshin bizde barlyq múmkindikter bar, resýrs­tar jáne adamdar jetkilikti, - dedi Qazaqstan Prezıdenti.