«Birlik» partııasy sezd ótkizetinin jarııalady

NUR-SULTAN. QazAqparat – «Birlik» partııasy sezd ótkizetini týraly málim etti. Onyń barysynda partııa Jarǵysyna ózgeris engizý, uıymdastyrý qurylymyn ózgertý, partııanyń saıası atqarýshy komıtetiniń quramyndaǵy ózgerister, sondaı-aq jańa múshelerdi qosýǵa qatysty birqatar sheshimder qabyldanbaq, dep habarlaıdy QazAqparat tilshisi.

«Aýyl» partııasymen qosylý yqtımaldyǵy sońǵy sátke deıin saqtaldy. Sebebi bul bastama búgin atalmysh partııanyń sezinde talqylanǵan bolatyn. Atalǵan partııa seziniń qorytyndysy boıynsha onyń «Birlikpen» qosylý máselesi qoldaýǵa ıe bolǵan joq. Biz «Aýyl» partııasynyń sheshimin qabyldaımyz. Obektıvti túrde qarastyratyn bolsaq, AÓK salasyndaǵy jaǵdaıdy jaqsartý boıynsha naqty qadamdar jasamaǵan, karantın kezinde fermerler shyǵynǵa ushyrap, jumys isteı almaı júrgen kezde ózin esh kórsete almaǵan partııamen tandem qurý bizge qosymsha artyqshylyqtar ákelmeıdi. Sondyqtan «Birlik» partııasy óz betimen qyzmet atqara beretinin jarııalaǵym keledi», - dep atap ótti «Birlik» partııasynyń tóraǵasy Serik Sultanǵalı.

«Birlik» partııasy seziniń aldyn ala kún tártibi kelesideı:

- uıymdastyrý qurylymyn ózgertý, Jarǵyǵa ózgerister engizý;

- partııanyń jańa múshelerin qabyldaý jáne partııanyń basqarý organdarynyń quramyn ózgertý.

«Aldaǵy sezde jańartylǵan tuǵyrnama talqylanyp, partııanyń aktıvi qurylady. Partııa apparaty qazir sezge daıyndyq júrgizýde. Bizdiń partııa saıası básekelestikti qoldaıdy jáne búgingi kúni ekonomıkalyq jáne áleýmettik realııge jaýap beretin partııanyń jańartylǵan tuǵyrnamasyn keń jurtshylyqqa tanystyrýǵa daıyn», - dep atap ótti partııanyń basshysy.

Eske salaıyq, búgin elordada «Aýyl» halyqtyq-demokratııalyq patrıottyq partııasynyń kezekten tys 17-sessııasy ótti. Onyń barysynda «Birlik» partııasynyń «Aýyl» partııasyna qosylý týraly usynysy qaraldy. Nátıjesinde, delegattardyń 72-si eki partııanyń qosylýyna qarsy daýys berse, 8-i sheshimdi qoldady. Bir delegat qalys qaldy.