«Birlik» partııasy «7-20-25» baǵdarlamasyn jandandyrýdyń tyń jolyn usyndy
Partııa tóraǵasynyń orynbasary Tólegen Qýanyshevtiń aıtýynsha, búginde qurylys kompanııalary jańa páterlerdiń baǵasyn negizsiz kóterip tastady. Sonyń nátıjesinde «7-20-25» baǵdarlamasy boıynsha úıler baıaý satylýda.
«Keshegi Joldaýda Memleket basshysy «7-20-25» baǵdarlamasyn iske asyrý jumysy baıaý atqarylyp jatyr dedi. Shynymen de, solaı. Bizdińshe, atalǵan problemanyń negizgi sebebi - nesıeniń tek jańa páterlerge ǵana berilýi. Qurylys kompanııalary osyny bile tura, birden óz baǵalaryn 10-15 protsentke kóterip tastady. Sonyń saldarynan baǵdarlamany iske asyrý sharalary tejelip qaldy», - dedi T.Qýanyshev Demokratııalyq kúshterdiń «Qazaqstan-2050» jalpyulttyq koalıtsııasynyń otyrysynda.
«Birlik» partııasy «7-20-25» baǵdarlamasy aıasynda bes jyldan aspaǵan páterlerge de nesıe berýdi usynyp otyr. Sonda jańa naryqqa básekelestik bolady. Al qurylys kompanııalary baǵany negizsiz kótermeıtin bolady.
«Osy sheshimniń arqasynda qurylys kompanııalardyń «tábetin» tejeýge bolady. Eń bastysy, xalyq «7-20-25» baǵdarlamasymen úıdi óz baǵasyna alady. Árıne, jergilikti atqarýshy organdar alǵashqy jarna jaǵynan kómektesetin bolsa, osy saladaǵy jumys jandana túsedi», - dep atap kórsetti T.Qýanyshev.
Aıta keteıik, keshe QR Prezıdenti Nursultan Nazarbaev «7-20-25» baǵdarlamasy aıasynda ákimderge jergilikti bıýdjet esebinen jeńildetilgen ıpoteka boıynsha alǵashqy jarnany ishinara sýbsıdııalaý máselesin pysyqtaýdy tapsyrdy.
«Mundaı turǵyn úı sertıfıkattaryn berý biliktiligi joǵary pedagogter, medıtsına qyzmetkerleri, polıtseıler jáne óńirge qajetti basqa da mamandar úshin ıpotekanyń qol jetimdiligin arttyrady. Sondaı-aq, halyqtyń áleýmettik turǵydan álsiz toptary úshin iri qalalarda jaldamaly turǵyn úı qurylysyn ulǵaıtý qajet. Bul sharalar 250 myńnan astam otbasy úshin turǵyn úı jaǵdaıyn jaqsartýǵa múmkindik beredi», - delingen Joldaýda.
