«Birlik merekesi ulttardy qazaqtyń tóńiregine toptastyrýdy kózdeýi tıis» - respýblıkalyq basylymdarǵa sholý

«Keshe Prezıdent Nursultan Nazarbaev mektepke deıingi bilim berý mekemelerindegi oryn jetispeýshiligin tómendetý maqsatynda arnaıy ázirlengen «Balapan» baǵdarlamasynyń Astana qalasynda júzege asyrylý barysymen tanysty», dep jazady «Egemen Qazaqstan» gazeti. Astana ákimi Imanǵalı Tasmaǵambetov Elbasyna atalǵan baǵdarlamada qoıylǵan maqsattarǵa jetý úshin birneshe baǵyttarda jumys júrgizilip jatqanyn jetkizdi. Olardyń qatarynda óz maqsatynda paıdalanylmaǵan balabaqsha ǵımarattaryn kommýnaldyq menshikke qaıtarý, jańa balabaqshalar salý, jańa turǵyn úı keshenderiniń birinshi qabattarynan shaǵyn ortalyqtar qurý, memlekettik tapsyrys boıynsha jeke menshik balabaqshalar ashý, jeke ınvestıtsııalar esebinen balabaqshalar qurylysyn júrgizý sııaqty mindetter bar. Basylymnyń jazýynsha, el Prezıdenti N.Nazarbaev Mırzoıan kóshesindegi kúrdeli jóndeýden ótken 240 oryndyq №47 «Aq jelken» balabaqshasynyń ashylý saltanatyna qatysty. Maqala «Elbasy búldirshinder qýanyshyna ortaqtasty» degen taqyryppen berilgen.

Osy jaıtqa keńinen toqtalǵan «Kazahstanskaıa pravda» gazeti «Balapan» baǵdarlamasy iske qosyldy. Prezıdent Nursultan Nazarbaev Astanadaǵy balabaqshalardyń qurylysy barysymen tanysty», dep jazady. Basylymnyń atap ótýinshe, Elbasy atqarylyp jatqan jumystarǵa oń baǵasyn berip, aǵymdaǵy jyly Astanada 10 jańa balabaqsha ashylatyndyǵyn atap ótken. Sonymen qatar jańa turǵyn úı keshenderiniń birinshi qabattarynda shaǵyn ortalyqtar qurý qarastyrylýda. Osyǵan oraı jyl sońyna deıin jalpy 30 jańa mektepke deıingi balalar mekemesi paıdalanýǵa berilmek.

«Egemen Qazaqstan» gazetiniń QR Prezıdentiniń baspasóz qyzmetine silteme jasap habarlaýynsha, keshe Aqordada Memleket basshysy Nursultan Nazarbaev jańadan taǵaıyndalǵan Qazaqstan Respýblıkasyndaǵy elshilerden Senim gramotalaryn qabyldady. Prezıdentke Ulybrıtanııa jáne Soltústik Irlandııa Koroldiginiń Tótenshe jáne ókiletti elshisi Devıd Djon Moran, Belarýs Respýblıkasynyń Tótenshe jáne ókiletti elshisi Valerıı Brylev, Iran Islam Respýblıkasynyń Tótenshe jáne ókiletti elshisi Gorban Seıfı, Túrkimenstannyń Tótenshe jáne ókiletti elshisi Maqtymquly Aqmyradov Senim gramotalaryn tapsyrdy.

Memleket basshysy elimizdiń iri saýda seriktesi bolyp tabylatyn jáne qazaqstandyq ekonomıkaǵa tike ınvestıtsııa tartý kólemi jaǵynan tórtinshi orynǵa ıe Ulybrıtanııamen yntymaqtastyqqa úlken mán beretinin, Qazaqstan men Belarýs yntymaqtastyǵy jańa sapaly deńgeıge kóteriletinin, Qazaqstan Iranmen dástúrli dostyq jáne seriktestik qarym-qatynastarǵa úlken mán beretindigin, sondaı-aq Túrkimenstanmen ózara tıimdi yntymaqtastyqtyń odan ári damýyna qyzyǵýshylyq tanytatyndyǵyn atap ótken.

Osy mańyzdy oqıǵaǵa keńinen toqtalǵan «Aıqyn» gazeti búgingi nómirinde «Qazaqstan óz aımaǵynyń sheshýshi memleketi retinde qalyptasty» degen taqyryppen maqala basty. Onda Elbasynyń «Búginde Qazaqstannyń daǵdarystan keıingi damýynyń irgetasyn qalap jatyrmyz. Osy jyldan bastap, údemeli ındýstrııalyq-ınnovatsııalyq damý baǵdarlamasyn júzege asyrý qolǵa alyndy, bul moıyny ozyq memleketterimen ózara tıimdi, kópqyrly yntymaqtastyq úshin úlken óris, mol múmkindikter ashady», degen sózi berilgen.

«Memleket basshysy Nursultan Nazarbaev Qazaqstan Respýblıkasynyń Memlekettik qyzmet isteri jónindegi agenttiginiń tóraǵasy Qaırat Nurpeıisovti qabyldady», dep jazady «Egemen Qazaqstan» gazeti Prezıdentiniń baspasóz qyzmetine silteme jasap. Q.Nurpeıisov Prezıdentti Agenttiktiń ótken kezeńdegi jumys qorytyndylarynan habardar etti. Áńgimelesý barysynda sondaı-aq memlekettik qyzmetti odan ári jetildirý, kadrlar almastyrý jónindegi jumystar, óńirlik tártiptik keńesterdiń qyzmetine, atap aıtqanda, sybaılas jemqorlyq quqyq buzýshylyǵynyń aldyn alýǵa jáne sybaılas jemqorlyqpen kúreske baılanysty máseleler týraly áńgime boldy.

***

«Aıqyn» gazetiniń dástúrli «Aq sóıle!» aıdarynyń búgingi qonaǵy - sýretshi, Qazaqstannyń eńbek sińirgen óner qaıratkeri, Memlekettik syılyqtyń laýreaty Erbolat Tólepbaı. «Ǵajaıyp murajaı salǵym keledi» degen taqyryppen berilgen ekeýara áńgime barysynda qylqalam sheberi basylym tilishisiniń barlyq suraqtaryna tuşymdy jaýap bergen. Suhbattyń tolyq nusqasyn basylymnyń juma kúngi nómirinen oqı alasyzdar.

«Qazaqstanda ótken ǵasyrdaǵy jappaı asharshylyq kezinde mıllıondaǵan, tipti burynǵy KSRO halyqtary arasynda eń kóp adam qyrylǵan. Eýropa keńesi Parlamenttik assambleıasynyń (EKPA) 30-shy jyldardaǵy jappaı ashtyq qurbandaryn eske alý qararynda osyndaı boljam jasalǵan. Eýropalyq depýtattar endi tarıhı shyndyqty ornatý úshin burynǵy keńes elderi úkimetterin óz muraǵattaryn ashyp, olarǵa otandyq ǵalymdarmen qatar eýropalyq sarapshylardy jiberýge ruqsat berýin suraıdy», dep jazady «Aıqyn» gazeti. Basylymnyń búgingi nómirinde «Eýropa asharshylyq jaıly tarıhı shyndyqty qalaıdy» degen taqyryppen berilgen maqalaǵa tuzdyq retinde tarıh ǵylymynyń doktory, professor Mámbet Qoıgeldıev pen jazýshy Smaǵul Elýbaev atalǵan qararǵa, elimizdi sol bir kezeńderde qamtyǵan asharshylyq jaıynda óz pikirlerin bildirgen.

***

«Alash aınasy» gazetiniń búgingi nómiri 1-shi mamyr birlik merekesine arnalypty. Tutastaı merekelik nómirge arnalǵan gazet betinen kóptegen qyzyqty aqparattarmen qanyǵýǵa bolady. Máselen, 4-shi bette «Biz qazaqsha sóıleımiz» degen taqyryppen búginde telejýrnalıstıka salasynda qyzmet etip júrgen Maııa Veronskaıa, Maksım Nıkolaev, Oksana Loskýtova, Anna Danchenko, ıÝlııa Kýshnareva, Igor Sahar sekildi ózge ulttyń ul-qyzdarynyń syr suhbaty jarııalanǵan. Sondaı-aq osy betten «Qazaqqa qazaqsha úıretken» degen taqyryppen apaly sińili Tatıana men Svetlananyń qazaq mektepterinde qazaq balalaryna qazaqsha úıretip júrgen is-áreketi baıandalǵan.

«Birlik merekesi ulttardy qazaqtyń tóńiregine toptastyrýdy kózdeýi tıis» atty maqalada «Bul rette, 1 mamyr merekesi, eń aldymen, el men jerdiń negizgi tutqasy - qazaq halqynyń mereıin ósirýge jáne el aýmaǵyndaǵy ózge ulttardyń qazaq mádenıetine degen súıispenshiligin oıatyp, qurmetin qalyptastyrýǵa yqpal etse, ıgi» deı kelip, Ol úshin 1 mamyrda el kınoteatrlarynyń bárinde qazaq kınolary kórsetilip, mereke barysynda qazaq óneriniń úlken festıvali ótkizilse... Sondaı-aq, respýblıkamyzdy mekendeıtin ózge ult ókilderi arasynda qazaqtyń tili men tarıhyn, ónerin nasıhattaýǵa múmkindik beretin arnaıy konkýrs uıymdastyrylyp, ol jalpyhalyqtyq dástúrli sharaǵa aınalsa jáne ony ótkizýdiń kúlli jaýapkershiligi Qazaqstan halyqtary Assambleıasyna júktelse... Mádenıet mınıstrligi tarapynan, elimizdegi ózge ulttardyń teatrlaryna kórnekti qazaq dramatýrgteriniń úzdik pesalaryn sahnalaý isi mindettelinse jáne 1 mamyrda olar sol qoıylymdary boıynsha ózara konkýrsqa tússe... degen oılar aıtady.