Birlik kúni Jarkentte kópbalaly otbasylar baspanaly boldy

ALMATY OBLYSY. PANFILOV AÝDANY. QazAqparat – Panfılov aýdanynda halyq birliginiń meıramyn atap ótý barysynda az qamtylǵan kóp balaly eki otbasynyń mereıi ústem bolyp, baspanaǵa ıe boldy, - dep habarlaıdy tilshi.

1 mamyr – Qazaqstan halqynyń birligi kúni Jarkent qalasynyń ortalyq alańy merekelik sán-saltanatpen bezendirilip, ásem án men tátti kúı áýeleı shyrqaldy.

Aýdan ákimi Marat Rahymberdiuly Saǵymbek qala turǵyndary men qonaqtaryn mereıli merekemen quttyqtap, jazıraly Jarkent jerinde halyqtar dostyǵy men yntymaǵyn nyǵaıtýǵa súbeli úles qosyp júrgen belsendi azamattardy «Qurmet gramotasymen» jáne «Alǵys hatpen» marapattady.

Sonymen qatar «Qareket» qaıyrymdylyq qorynyń Almaty oblysy boıynsha uıymdastyrýshysy Amangeldi Tolamysovpen birge Jarkent qalasynyń turǵyny Fatıma Jumabaeva men Aıdarly aýylynyń turǵyny Nurshat Aıtbaevaǵa jańa úılerdiń kiltterin saltanatty túrde tapsyrdy.

Merekelik sharada sondaı-aq, jarkenttik jıyrmadan astam altyn qursaqty analarǵa «Altyn alqa» jáne «Kúmis alqa» alqalaryn tabys etti. Qala halqynyń qajetin óteý jolynda qajyrlylyqpen qyzmet etip júrgen «Jarkent sý qubyry» mekemesine de osy zamanǵy ozyq úlgide jumys isteıtin birneshe arnaıy tehnıkanyń kilti saltanatty jaǵdaıda berildi.

Merekelik shara sońy aýdan kórkemónerpazdarynyń kóńildi kontserti men halyqtyq seıilge ulasty.

Nurádil Begimbet