Birlik degen sóz bizdiń ata-babalarymyzdan qalǵan óte uly, tereń maǵynaly uǵym-Elbasy

Memleket basshysy eń aldymen barsha qazaqstandyqtardy Qazaqstan halqynyń birligi meıramymen shyn júrekten quttyqtady.

- Biz bul merekeni erekshe atap ótip otyrmyz. Sebebi, bıyl elimiz táýelsizdiginiń 20 jyldyǵy. Osy oraıda, búgingi merekeni birlik aıasynda bastap otyrmyz. Ózderiń de bilesizder, birlik degen sóz bizdiń ata-babalarymyzdan qalǵan óte uly, tereń maǵynaly uǵym. Biz táýelsizdigimizdiń 20 jyldyǵy ishinde birliktiń arqasynda irgeli el boldyq. Mereıimiz kóterilip, dúnıe júzine belgili boldyq. Ekonomıkamyzdy kóterdik. Halyqtyń ál-aýqatyn jaqsarttyq. Elordamyzdy saldyq.

Keshe ǵana búkil dúnıeni dúr silkintken EQYU-nyń sammıtin ótkizdik. Keshe ǵana biz Azııa oıyndarynda sport jarystaryn ótkizip, taǵy da dúnıe júzine keńinen tanyldyq.

Qazaqstanda Azııa elderi Islam Konferentsııasy Uıymynda bas qosqaly otyr. Osynyń barlyǵy Táýelsizdigimizdi alǵaly bergi birliktiń arqasynda júzege asty. Ekonomıkamyzdyń turaqtylyǵynyń arqasynda múmkin boldy. Halyqtyń ál-aýqatynyń jaqsarǵany men tynyshtyqtyń arqasynda iske asty.

Bizge búkil dúnıe júzi kóz tigip otyr. Biz dinder sezin jáne túrli halyqaralyq jıyndardy uıymshyldyqpen ótkizdik. Sondyqtan da kúlli álem Qazaqstanǵa iltıpatpen qaraıdy.

Búgin Qazaqstannyń barlyq aýmaǵynda, aýyldarda, aýdandarda, qalalarda merekelik is-shalalar ótýde. Merekege jıylǵan halyqtyń barlyǵyn da quttyqtap, bereke -birlik tileımin.

Bizdiń aldymyzda jasaıtyn jumystar men asýlar áli de kóp. Myna shyr aınalǵan dúnıede túrli qıynshylyqtardy bastan ótkerip jatqan kezde, bizdiń elde baǵdarlamalar men óndirister iske asyrylýda. Osynyń barlyǵy Qazaqstandaǵy birliktiń arqasynda. «Tórteý túgel bolsa, tóbedegi keledi, altaý ala bolsa, aýyzdaǵy ketedi» degen ata-babalarymyzda sóz bar. Sondyqtan da birligimiz nyǵaıa bersin -, dedi N. Nazarbaev.

Memleket basshysy qazaq­stan­­dyq­tardyń bul merekeni bı­yl jańasha atap ótip jatqanyna nazar aýdaryp, búgingi mereke Qazaqstannyń barlyq aýmaǵynda, aýyldarda, aýdandarda, qalalarda halqymyzdy biriktiretin kún retinde atalyp ótip jatqandyǵyn atap kórsetti. Sondaı-aq taıaýda bolyp ótken kezekten tys prezıdenttik saılaý halqymyzdyń birligin kórsetkenin aıryqsha atap kórsetti. «Bul jáıt barlyq otandastary­myz­dyń bir jaǵadan bas, bir jeńnen qol shyǵarǵanyn aıǵaqtap berdi», - dedi Nursultan Nazarbaev.

- Bizdiń Konstıtýtsııamyz «Biz Qazaqstan halqy...» degen sózdermen bastalatyny kezdeısoqtyq emes. Birliktiń arqasynda, senimniń arqasynda, bizdiń kópultty Qazaqstannyń osyndaı birliginiń arqasynda biz táýelsiz Qazaqstandy qurdyq, biz ekonomıkany kóterdik, biz azamattarymyzdyń senimdi bolashaǵynyń negizin qaladyq, - dep atap ótti Memleket basshysy.

- Qalalar, aýyl­dar sa­lyp, ónerkásipti, aýyl shar­ýashylyǵyn kóterýdemiz, ýnı­versıtetter turǵyzyp, bala­larymyzdy sheteldermen qatar, solarda oqytýdamyz. Osynyń bar­lyǵyna birliktiń, elimizdiń ju­dyryqtaı jumy­lýynyń arqa­syn­da qol jetkizip otyr­myz. Al álemde ózderińiz kórip otyr­ǵan­daı, zaýyttar toqtap, adamdar ju­mys­syz qalýda. Biz bolsaq, jańa ká­siporyndar quryp, jańa jumys oryn­daryn jasaqtaýda­myz. Dúnıe jú­zinde dinı jáne ultaralyq túsinispeý­shilik sal­da­rynan qaqtyǵystar oryn alyp, qan tógilýde. Biz tutastyqtyń úlgi­sin kórsetip otyrmyz. Qazaqstan elimizde ómir súrip jatqan barlyq etnostardyń birligin nyǵaıtýda. Olar barlyq jerde bizben birge, barlyq ujymdar kópultty, - dedi Prezıdent.

N. Nazarbaev búginde Qazaqstanda turyp, ómir súrý kim-kim úshin de már­te­b ekendigin, árbir qazaqstandyq óziniń bo­lashaǵyn bekem sanasa, bala­la­ry­nyń bolashaǵyna senimmen qaraı­tyndyǵyn atap kórsetti.

- Biz qazaqstandyqtar jumys istep, baspanaly bolýlary úshin, ózderi de mamandyq alyp shyǵyp, balalaryn jańa mamandyqtarǵa oqytýlary úshin eńbektenýdemiz. Olar eń úzdik medıtsınalyq mekemelerde emdelýleri úshin, bizdiń balalarymyz úzdik mektepterde bilim alýlary úshin qyzmet atqarýdamyz. Biz munyń bárin júzege asyramyz. Meniń Joldaýym, 2020- Baǵdarlamasy bizdiń jaqsy turýymyzǵa, tynyshtyq bolyp, bizdiń bolashaǵymyz budan da jaqsy bolýyna baǵyttalǵan. Osyny iske asyrý úshin taǵy da birlik, taǵy da baýyrmaldyq, taǵy da barlyq halyqtyń súıispenshiligi kerek. Osy mereke kúni bir-birimizge degen qurmetimiz ben súıispenshiligimizdi kórseteıik. Kúlli álemge birligimizdi kórseteıik, - dedi Nursultan Nazarbaev.

Sonymen qatar Prezıdent bú­ginde bizdiń tolerant­ty­lyǵy­myz­dy, birligimizdi, barlyǵymyz­dy tutastyryp otyrǵan Qazaqstan halqy Assambleıasy sııaqty tamasha organnyń jumysyn syrt­ta­ǵylar oqyp, úırenip jatqanyn atap kórsetti.

- Birlik bar jerde tirlik bar» degen ata-babamyzdan qalǵan qaǵıdatty ustansaq, bolashaǵymyz baıandy bolady. Jastarymyz baqytty bolady. Elimiz myqty bolady. Budan ári de Qazaqstannyń dárejesi men mereıi arta beredi. Elimiz aman, jurtymyz tynysh bolsyn. Táýelsizdigimiz máńgilik bolsyn. Barlyqtaryńyzǵa jaqsylyq tileımin!, - jdedi N. Nazarbaev.