«Birligimiz jarasqan!» ulttyq syılyǵynyń ıegerleri anyqtaldy

ANA. 15 aqpan. QazAqparat /Gúlmıra Álıakparova/ - «Birligimiz jarasqan!» syılyǵynyń qoǵamdyq keńesi búgin, syılyq laýreattaryn anyqtaý úshin Astana men Almaty qalalarynda on-laın otyrysyn ótkizdi.

Oǵan elordada Májilis depýtaty Elena Tarasenko, Qazaqstannyń isker áıelderi qaýymdastyǵynyń prezıdenti Raýshan Sársembaeva, «Qazaqstannyń Azamattyq alıansy» ZTB atqarýshy dırektory Alına Hamatdınova, Almatyda - qazaqtyń birtýar ánshisi Bıbigúl Tólegenova, Aqjol Meıirbekov, jýrnalıster Artýr Platonov pen Inna Rýdakova jáne taǵy basqalar qatysty.

Kúndelikti jasap júrgen qyzmetterimen, jasaǵan erlikterimen, qoǵam men eldiń damýyna súbeli úlesterin qosyp júrgen qarapaıym azamattardy atap ótý Qazaqstannyń Azamattyq Alıansy, Qoǵamdyq saıasatty damytý ınstıtýty, «Jasyl el» QB, «Úı» meıirimdilik qoǵamy, Qazaqstannyń Іsker áıelderi qaýymdastyǵy jáne KTK telearnasynyń birlesken jobasy.

Syılyqqa nomınanttardy usyný byltyrǵy jyldyń qazan aıynda bastaldy. Jobaǵa barlyǵy 200-den astam ótinim usynylyp, olar birneshe irikteýden ótti. Búgin qoǵamdyq keńes músheleri 20 úmitkerdiń arasynan tańdaý jasady.

«Atalmysh syılyq - barsha qazaqstandyqtardy «Birligimiz jarasqan!» izgi ister men jasampaz isterdiń ortaq qozǵalysyna qosylýǵa tikeleı úndep shaqyrý ǵana emes, sondaı-aq el bolashaǵyna senetin ári onyń gúldenýi úshin tirshilik áreketteriniń barlyq salalarynda belsendi jumys isteıtin eldiń naǵyz halyqtyq qaharmandary týraly baıandaý múmkindigi. Bul ulttyq syılyq qarapaıym adamdar men olardyń kúndelikti atqaryp júrgen el úshin mańyzdy qyzmetterin kópshilikke pash etedi», - dedi R.Sársembaeva.

Syılyq ıegerleri anyqtalǵanymen, uıymdastyrýshylar olardyń esimderin saltanatty marapattaý ótetin 2011 jylǵy naýryz aıynyń 3-ine deıin qupııada saqtaýdy jón kórdi.