Birlesken astyq kompanııasyn qurý boıynsha jumystar egin oraǵyna deıin aıaqtalady - AShM
ASTANA. Qańtardyń 18-i. QazAqparat /Rýslan Ǵabbasov/ - Jańa erejelerge sáıkes, bıylǵy jyly astyq daqyldaryn egetinderge qaraǵanda maıly daqyldardy ósiretinder 10 ese, al jemshóp ósiretinder 30-85 paıyzǵa artyq sıbsıdııa alady.
Bul týraly búgin Astanada ótken alqa májilisinde Aýyl sharýashylyǵy mınıstri Aqylbek Kúrishbaev málim etti, dep habarlaıdy QazAqparat.
«Búginde astyqty óndirý kóleminde, ony saqtaý jáne eksporttaý ınfraqurylymy múmkindikteri arasynda alshaqtyq bar. Buny sheshý úshin «QazAgro» holdınginiń qarjylandyrý júıesi aıasynda elimizdiń astyq ósirýshi negizgi óńirlerinde elevatordyń qurylysy boıynsha sharalardy basymdyqty nesılendirý josparlanyp otyr. Sonymen birge, Qara teńiz porttarynda jáne Qytaımen aradaǵy shekarada astyq termınaldaryn qurýdy jedeldetip, elimizdiń astyq tasymaldaý vagondarynyń jeke parkin jasaqtaý qajet», -dedi mınıstr.
A. Kúrishbaevtyń sózine qaraǵanda, osy turǵyda memlekettik-jekemenshik seriktestikke negizdelgen birlesken astyq kompanııasyn qurý óte mańyzdy sanalady. Bul kompanııa astyq resýrstaryn basqarý, kólik logıstıkasyn salý jáne biryńǵaı eksporttyq saıasatty júrgizýde iri operatordyń rólin atqarmaq.
«Ony qurý boıynsha jumystar bastaldy. Atap aıtqanda, bıylǵy jyldyń egin oraǵy naýqanynynyń aldynda bul jumysty aıaqtaýǵa nıettimiz»,-dedi mınıstr.
