Birqatar jobadan 44 trln teńgeden astam ınvestıtsııa kútilýde – Asqar Mamın

NUR-SULTAN. QazAqparat – QR Premer-Mınıstri Asqar Mamın negizgi kapıtalǵa ınvestıtsııalar tartý jobalary týraly aıtty, dep habarlaıdy QazAqparat.

«Investorlarmen jumystyń jedel monıtorıngi men úılestirýin qamtamasyz etý maqsatynda ınvestor tartý máseleleri jónindegi keńes (ınvestıtsııalyq shtab) qyzmeti iske qosyldy. Investıtsııalyq shtabtyń jumysy aıasynda 2021-2025 jyldarǵa arnalǵan jobalar pýly qalyptastyryldy, bul 3 myńǵa jýyq jobadan turady, olar negizgi kapıtalǵa 44,7 trln teńge ınvestıtsııany qamtamasyz etedi», - dep jazdy Premer-Mınıstr depýtattyq saýalǵa bergen jaýabynda.

Onyń aıtýynsha, atalǵan jobalardy iske asyrý salalyq ortalyq jáne jergilikti atqarýshy organdardyń birinshi basshylary jasaǵan negizgi kapıtalǵa ınvestıtsııalar tartý jónindegi memorandýmdarda bekitilgen.

«Investıtsııalar úshin básekelestikti yntalandyrý maqsatynda óńirlik deńgeıde qabyldanatyn sharalardyń tıimdiligin keshendi baǵalaýǵa jáne ınvestorlarmen jumys isteýdegi úzdik tájirıbeni anyqtaýǵa múmkindik beretin óńirlerdiń ınvestıtsııalyq tartymdylyǵynyń reıtıngi qoldanylady», - dep atap ótti Premer.

Atap aıtqanda, sheteldik ınvestorlar qatysymen iske asyrylatyn basym salalardaǵy jobalarǵa erekshe kóńil bólinedi. Strategııa ınvestıtsııalardy belsendi tartý úshin salalardyń eki tobyn aıqyndady. Birinshi top – qoldanystaǵy qysqa merzimdi jáne orta merzimdi perspektıvada QR básekelestik artyqshylyqtarynyń kózi bolatyn áleýetti salalar. Osy top aıasynda tamaq ónerkásibi, metallýrgııa, hımııa, munaı hımııasy jáne mashına jasaý sııaqty salalar aıqyndaldy. Ekinshi top – ınvestorlar uzaq merzimdi perspektıvada múddeli bolýy múmkin salalar. Bul baǵytta Strategııa aqparattyq-kommýnıkatsııalyq tehnologııalar, týrızm jáne qarjy sııaqty salalardy anyqtady.