Birqatar túrik kompanııalary Qazaqstanda ınvestjobalardy iske asyrmaq
ASTANA. QazAqparat - «Kazakh Invest» UK basqarma tóraǵasy Saparbek Tuıaqbaev jumys saparymen 23-24 aqpanda Túrik Respýblıkasyna baryp, alty iri túrik kompanııasy - KOÇ Holding, YILDIZLAR SSS Holding, YILDIRIM Holding, KİBAR Holding, SABANCI Holding, DAL Holding Investment basshylarymen kezdesti, dep habarlaıdy primeminister.kz.
Kazakh Invest túrik bıznesmenderine Qazaqstan úshin basymdyqty ekonomıka salalarynda 47 iri ınvestjobany usyndy.
Atalǵan holdıngter iri transulttyq kompanııalar bolyp tabylady, olardyń jalpy jyldyq aınalymy shamamen $150 mlrd quraıdy. Túrik bıznesmenderi óziniń óndiristik qýattylyqtaryn jáne EAEO men QHR elderine ótkizý naryqtaryn keńeıtý úshin elimizdiń strategııalyq ornyn atap ótip, Qazaqstan aýmaǵynda ınvestjobalardy iske asyrýǵa qyzyǵýshylyq tanytty.
Mysalǵa, KOÇ Holding-pen Qyzylorda oblysynda tomat jáne konservilengen ónimder óndirisi týraly kelisimge qol jetkizildi. Kompanııa sondaı-aq suıyltylǵan gaz óndirý boıynsha jobaǵa qatysýǵa qyzyǵýshylyq tanytty.
YILDIRIM Holding «Qazgeologııa» AQ-men birge $10 mln-ǵa qatty paıdaly qazbalar barlaý boıynsha, sondaı-aq Jambyl oblysynda kaltsıı qosylǵan soda óndirý boıynsha jobalardy iske asyrýǵa kirisedi, jalpy ınvestıtsııalar somasy $220 mln quraıdy.
Yildizlar SSS Holding kelisim boıynsha birinshi jartyjyldyqta úsh jobany iske asyrýdy bastaıdy: «Baıqońyr» ÁKK-men birge $50 mln-ǵa qýattylyǵy 138 MVt gaz porshendi elektr stantsııasynyń qurylysy, Qyzylorda oblysynda $128 mln-ǵa qýattylyǵy 10 mln m2 keramıkalyq plıtalar óndirisi, sondaı-aq ınvestıtsııa somasy $10 mln-ǵa Shyǵys Qazaqstan oblysynda qatty paıdaly qyzbalardy barlaý boıynsha joba.
KIBAR Holding Mańǵystaý oblysynda sendvıch-panelder óndirý boıynsha jobaǵa qatysýǵa sheshim qabyldady.
Dal Holding basshylyǵy Jambyl oblysynda barıt keni men kontsentrattaryn óndirý jáne qaıta óńdeý boıynsha jobaǵa qatysýǵa bel býdy.
Sondaı-aq, osy kúnderi Ankarada Túrkııadaǵy QR Elshiliginiń qoldaýymen Túrkııa ónerkásip ıeleri men kásipkerleriniń táýelsiz qaýymdastyǵy (MUSIAD) múshelerimen ınvestıtsııalyq forým ótti. Atalǵan uıym Túrkııa ishinde jáne shetelde tarmaqtalǵan iskerlik jelige ıe, músheleriniń jalpy sany 11 myńnan asady.
Forýmda Kazakh Invest tarapynan Qazaqstannyń ınvestıtsııalyq múmkindikteri, shetel ınvestorlary úshin artyqshylyqtar túrindegi memlekettik qoldaý sharalary tanystyryldy.
MUSIAD basshysy Ilhan Erdal túrik bıznesi Qazaqstanmen tyǵyz ekonomıkalyq baılanystar ornatýǵa múddeli ekendigin basa aıtty. 2017 jylǵy naýryzda Qazaqstanǵa naryqty zertteý men iskerlik seriktestermen kezdesýge Túrkııanyń tamaq salasyndaǵy 15 iri kompanııasynyń ókilderi jiberiletini týraly kelisim jasaldy.
